Për sfidat që e përcollën në fillimet e karrierës, paragjykimet, rolet, vështirësitë dhe sukseset, flet ekskluzivisht për InLajmin, aktorja e mirënjohur Irena Aliu.
InLajmi: Që sa vite merreni me aktrimin dhe sa ka qenë sfiduese për kohën tuaj që të krijoni një karrierë si aktore?
Irena Aliu: Me aktrim merrem më shumë se 2 dekada. Një prej sfidave ka qenë se kur unë kam diplomuar dhe kam filluar të merrem me aktrim situata politike dhe ekonomike ka qenë kogja e vështirë.
InLajmi: A keni pasur paragjykime nga familja, rrethi, shoqëria për profesionin e aktrimit, sa keni marrë përkrahje në fillimet e juaja?
Irena Aliu: Jo, nuk kam pasur paragjykime as nga familja e as nga shoqëria. Edhe nëse dikujt nuk i ka pëlqyer ajo çka unë studioj nuk ka qenë problem i imi. Unë e kam dashur dhe e dua profesionin tim, pa marrë parasysh se kush çka ka menduar ose mendon.
InLajmi: Cili është momenti më i bukur nga “Kafeneja jonë“, a do ta veçonit një prej tyre që edhe sot e kujtoni me plot nostalgji?
Irena Aliu: Si te “Kafeneja jonë” ashtu edhe në projektet e tjera që i punoj çdo moment është i veçantë. Është e vështirë për t’i veçuar.
InLajmi: A ju kanë krijuar afërsi me njerëzit rolet komike dhe a ndodh shpesh që ju thërrasin me emrat e roleve (Ganja, Argjenda) kur i takoni?
Irena Aliu: Po, normal që publiku që na shikon krijon një afërsi me ne. Çdo javë jemi në shtëpitë e tyre dhe kjo u jep atyre një përshtypje që na njohin edhe privatisht, e kjo i bënë ata që shpesh të harrojnë që ne quhemi ndryshe. Është diçka që e marrim si kompliment, pasi na dëshmon se sa të shikuara kanë qenë edhe janë serialet që kam luajtur dhe vazhdoj t’i luaj.
InLajmi: Si ka qenë eksperienca juaj te filmi “Tri dritare dhe një varje“, a jeni ndarë e kënaqur me suksesin e këtij filmi?
Irena Aliu: Uaaa, më ktheve shumë vite mbrapa. Ka qenë një eksperiencë shumë e bukur e lodhshme e shumë sfiduese. Po besoj, që mund të ketë pasur jetë shumë më të gjatë.
InLajmi: Cili ka qenë roli më i vërshtirë që e keni luajtur?
Irena Aliu: Unë zakonisht mundohem të pranoj role që më sfidojnë, kështu që të gjitha rolet e kanë vështirësinë e vet.
InLajmi: Nga të gjithë filmat apo shfaqjet që keni luajtur, a do ta veçoni njërën që e keni më të preferuar?
Irena Aliu: Jo, nuk mund ta ndaj asnjë.
InLajmi: Cili aktor apo aktore kosovare mendoni se e zë vendin e parë në aktrim?
Irena Aliu: Nuk po besoj që mund të bëj një vlerësim të tillë. Kosova ka shumë aktorë dhe aktore të mrekullueshme, vetëm po shpresoj që do të ketë punë edhe më shumë për të gjithë ata. Shqipe Vishaj /InLajmi/
