Kryetari i Kuvendit të Kosovës, Glauk Konjufca njoftoi se po vazhdon vizitën e tij në Strasburg ku zhvilloi takime, përcjell InLajmi.
Konjufca deklaroi se në këtë takime biseduan për procesin e anëtarësimit të Republikës së Kosovës në Këshillin e Evropës. Bashkëbiseduesit i njoftova me të arriturat e Republikës së Kosovës në fushën e sundimit të ligjit, të drejtave të njeriut dhe pakicave kombëtare.
Postimi i plotë i tij:
Edhe sot, në ditën e 3 të vizitës zyrtare në Strasburg, zhvilluam takime të frytshme me disa delagacione të shteteve anëtare në Asamblenë Parlamentare të Këshillit të Evropës, grupe politike dhe udhëheqës të komiteteve.
Kënaqësi të takoja kryesuesin e delegacionit francez në APKE, Bertrand Bouyx i shoqëruar nga anëtarët e delegacionit francez, kryesuesin e delegacionit turk, Ahmet Yildiz i shoqëruar nga anëtarët e delegacionit turk, zv.udhëheqësen e Grupit Socialist, Demokrat dhe të Gjelbërit, Selin Sayek Böke, kryesuesen e Komitetit për Barazi dhe mosdiskriminim, Mariia Mezentseva, si dhe kryesuesin e Komitetit për Çështje Ligjore dhe të Drejta të Njeriut, Damien Cottier.
Biseduam për procesin e anëtarësimit të Republikës së Kosovës në Këshillin e Evropës. Bashkëbiseduesit i njoftova me të arriturat e Republikës së Kosovës në fushën e sundimit të ligjit, të drejtave të njeriut dhe pakicave kombëtare. Po ashtu shkëmbyem pikëpamje për tema të tjera me interes dhe për thellimin e bashkëpunimit të ndërsjellë.
I falënderova për mbështetjen që i kanë dhënë Republikës së Kosovës ndër vite dhe për ndërmarrjen e hapave që të bëhet anëtare e Këshillit të Evropës.
Në punimet e Asamblesë Parlamentare të Këshillit të Evropës, Republika e Kosovës mori vëmendje të posaçme dhe mbështetje të theksuar nga eurodeputetët për anëtarësim.
Republika e Kosovës është e përcaktuar dhe po punon me përkushtim për t’u integruar në familjen e madhe evropiane. /InLajmi/
