Policia e Kosovës ka bërë apel sërish tek qytetarët që te kenë kujdes në rrugë, si shkak i reshjeve të shiut, përcjell InLajmi.
Nga Policia njoftuan se edhe ditët në vijim do të ketë reshje të shiut e në pjesë të ndryshme të vendit pritet të ketë edhe reshje bore, ku në disa segmente rrugore mund të ketë rrjedhje të ujit.
Njoftimi i plotë i Policisë së Kosovës:
APEL PËR KUJDES TË SHTUAR NË RRUGË!
Ditëve të fundit jemi përballur me reshje të shumta të shiut të cilat kanë shkaktuar vërshime në disa segmente ku ka pasur dëmtime në infrastrukturën rrugore, shembje të gurëve e dheut gjithashtu në vendet malore ka pasur reshje të borës ku është vështirësuar qarkullimi në trafik.
Sipas shërbimit meteorologjik edhe ditët në vijim do të ketë reshje të shiut e në pjesë të ndryshme të vendit pritet të ketë edhe reshje bore, ku në disa segmente rrugore mund të ketë rrjedhje të ujit, shembje të gurëve e dheut, po ashtu kujdes i shtuar duhet treguar edhe në ura ku mund të krijohet mjegull, ngrica dhe shtresa të akullit që ndikojnë në sigurinë e trafikut rrugor.
Policia e Kosovës, APELON të gjithë pjesëmarrësit që të respektojnë rregullat e trafikut, të përshtatin shpejtësisë e lëvizjes me kushtet e krijuara, të mbajnë distancë të sigurt në mes mjeteve, të mos përdorin telefonin gjatë ngasjes, të përdorin dritat dhe të përqendrohen në ngasje. /InLajmi/
