Lideri i Partisë Demokratike të Kosovës, Memli Krasnqi përkujtoi udhëheqësin e Rilindjes, Ismail Qemajli në 104 vjetorin e vdekjes, përcjell InLajmi.
Kryetari i PDK-së tha se Ismail Qemali mund të konsiderohet si politikani i parë shqiptar që ka përqafuar dhe promovuar liberalizmin.
Postimi i plotë i tij:
104 vjet pa liberalin e parë shqiptar, udhëheqësin e Rilindjes e themeluesin e shtetit, Ismail Qemali!
Sot mbushen 104 vjet nga vdekja e atit themelues të shtetit shqiptar dhe udhëheqësit të Rilindjes Kombëtare, shqiptarit të madh Ismail Qemalit. Prandaj, përkulemi me nderim e mirënjohje të thellë ndaj tij për kontributin e pallogaritshëm që ka dhënë si udheheqës i Rilindjes Kombëtare dhe si frymëzues i brezave të njëpasnjëshëm të veprimtarëve që kanë luftuar për lirinë e pavarësinë e popullit shqiptar në çdo kohë e krahinë të trojeve tona autoktone.
Ismail Qemali mund të konsiderohet jo vetëm si politikani i parë shqiptar që ka përqafuar dhe promovuar liberalizmin, por ka qenë edhe ndër të parët liberalë të shquar në Perandorinë Osmane, që kur themeloi gazetën e parë liberale, “Medjra-Efkiar”, të cilën e botonte në Plovdiv, jashtë kufijve të perandorisë, sepse sulltani e ndaloi botimin e saj në Stamboll për shkak të ideve përparimtare që parashtronte.
Ismail Qemali ishte bashkëthemelues i Partisë Liberal Otomane (Osmanlı Ahrar Firkası), që kishte huazuar traditën liberale britanike të partisë së drejtuar nga Ëilliam Gladstone. Gjatë kohës që ishte në krye të Partisë Liberale dhe gjithë opozitës në parlamentin otoman, ai u bë personaliteti më i zëshëm në perandori për promovimin e vlerave liberale si konstitucionalizmi, decentralizimi, barazia para ligjit dhe respektimi i të drejtave të qytetarëve dhe popujve.
Si pasojë e dështimit të kundër-revolucionit ndaj xhonturqve, ku ai ishte protagonist, Ismail Qemali u detyrua të arratisej, mirëpo tradita liberale që ai nisi në mexhlisin otoman u vazhdua prej bashkëpunëtorëve të tjerë të tij, si Basri Bej Dukagjini, Hasan Prishtina dhe Midhat Frashëri, të cilët themeluan Partinë e Lirisë dhe Mirëkuptimit (Hürriyet ve İtilaf Fırkası), ndryshe të njohur si Unioni Liberal.
Në respekt e nderim të veprës së Ismail Qemalit, por edhe të bindjeve dhe ideve liberale që ai dhe rilindasë të tjerë të shquar kanë shpalosur e mbrojtur ndër vite, jam shumë i lumtur dhe krenar që këto vlera sot qëndrojnë si shtylla të vizionit të Partisë Demokratike të Kosovë /InLajmi/
