Komisioni për Shëndetësi dhe Mirëqenie Sociale ka shqyrtuar Projektligjin për parandalimin dhe kontrollin e sëmundjeve ngjitëse, raporton InLajmi.
Deputeti i PDK-së Bekim Haxhiu, gjatë shqyrtimit të projektligjeve pati kritika për mungesën e ministrave në komision, të cilëve theksoi se nuk u është dërguar ftesa për pjesëmarrje.
Tutje, ai shprehu shqetësimin për ikjen e 1.000 punëtorëve nga sektori i shëndetësisë, duke thënë se qytetarët po detyrohen të shkojnë në sektorin privat nga pamundësia për t’u trajtuar në atë publik.
Gjithashtu deputeti tha se vërejtjet e profesionistëve shëndetësorë duhet të jenë plan i komisionit këtë vit.
“Kemi takuar bordin e ShSKUK-së, kemi qenë në vizita, i kemi parë problemet nga afër por nuk i kemi adresuar për t’i zgjidhur. I kemi pasur mbi 1.000 punëtorë që e kanë braktisur sektorin e shëndetësisë. Shërbimin shëndetësor qytetarët e kërkojnë në sektorin publik, mirëpo në pamundësi për ta marrë, shkojnë në sektorin privat. Mosftesa e ministrave në komision unë mendoj që ka qenë e qëllimshme. Pse ne duhet t’ua votojmë juve projektligjet që i sillni, kur ju nuk i keni votuar projektligjet që ne i kemi sjellë. Këto vërejtjet që janë nga profesionistët shëndetësor duhet të jenë plan i komisionit këtë vit. Unë mendoj se ky plan ishte tërësisht i papërmbushur, plani më i dobët që kam parë”, tha ai. /InLajmi/
