Vërshimet e mëdha nga reshjet e shumta të shiut kanë shkaktuar dëme të konsiderueshme në disa komuna të Kosovës, si në objekte banimi, toka bujqësore dhe bllokimin e shumë rrugëve.
Gjendja më e vështirë është raportuar në Komunën e Skenderajt, Mitrovicës, Klinës dhe Istogut, ku shumë familje kanë dal nga shtëpitë e tyre për ta kaluar natën tek familjarët e të afërmit e tyre, për shkak se objektet e tyre të banimit janë vërshuar nga uji.
Ministri i Administrimit dhe Pushtetit Lokal (MAPL), Elbert Krasniqi në një prononcim për Telegrafin ka thënë se nga vërshimet që kapluan të enjten disa komuna nuk ka viktima në njerëz por vetëm dëme të mëdha materiale.
“Në përgjithësi situata është e menaxhueshme dhe çka është më e rëndësishme nuk ka asnjë viktimë në njerëz. Ka dëme por ajo është më pak e rëndësishme në këtë moment. Në këtë moment jemi mobilizuar në mbështetje të kryetarëve të komunave, kryesisht ministrat që janë përgjegjës me mundësi mbështetëse si policia dhe FSK. Gjithçka është në koordinim”, ka thënë Krasniqi.
Ai po ashtu tregoi se janë 45 persona të evakuuar nga FSK-ja të cilët janë dërguar në Qendrën e Mjekësisë Familjare në Istog.
E, sa i përket numrit të qytetarëve të evakuuar në komunat tjera të vërshuara nga reshjet e shiut, Krasniqi nuk dha një shifër.
“Janë 45 persona të evakuuar prej FSK-së në QKMF në Istog, tash sapo i vizituam me kryeministrin dhe ministrin e Mbrojtjes, Mehaj. Edhe në qytetet tjera ka persona që kanë lëvizur në mënyrë autonome dhe ka raste ku policia ka asistuar. Nuk ka ndonjë numër të saktë që mund ta përmendim, mirëpo gjithandej ku ka pas vërshime autoritetet lokale dhe qendrore janë në mbështetje të qytetarëve”, ka thënë Krasniqi.
Ndryshe, reshjet e shumta të shiut kanë bërë që të enjten të ketë vërshime në disa komuna të Kosovës, gjë që ka shkaktuar edhe bllokim të rrugëve dhe depërtim të ujit nëpër disa shtëpi dhe banesa.
Ndërsa, të premten parashikohet të ketë reshje shiu, lokalisht në formë të rrebesheve, të cilat në orët e mëngjesit pritet të përzihen apo shndërrohen në ato të borës në zona të caktuara.
