Kryetari i Komunës së Mitrovicës, ka pritur në takim kryeinspektorin e AME-së, Kastriot Lajçi, këshilltarin politik të MPB- së Lorik Lipoveci, kryeshefin ekzekutiv të Ujësjellësit Rajonal “Mitrovica”, Bashkim Kurti si dhe drejtorin e Njësisë së Zjarrfikësve në Mitrovicë, Tahir Mikullovci, përcjell InLajmi.
Gjatë këtij takimi, kryetari Hamza, ka njoftuar të pranishmit lidhur me gjendjen e përgjithshme në Mitrovicë, të shkaktuar si pasojë e vërshimeve dhe përmbytjeve nga dita e enjte.
Po ashtu, kryetari Hamza ka falënderuar të pranishmit për gatishmërinë e treguar që brenda kompetencave të tyre t’i dilet në ndihmë familjeve që pësuan dëme materiale.
Edhe nga ana e të pranishmëve, është bërë e ditur se vetëm të mobilizuar e së bashku mund të tejkalohen situata të tilla të cila prekin drejtpërdrejtë jetën e qytetarëve të vendit tonë. /InLajmi/
