Reshjet e mëdha të shiut kanë shkaktuar vërshime në disa komuna të Kosovës, kryesisht në Mitrovicë, Istog, Skenderaj, Malishevë, Pejë, Gjakovë, Podujevë dhe Klinë, shkruan InLajmi.
Për Komunën e Klinës dhe gjendjen e vështirësuar sa i përket vërshimeve ka folur për Gazetën InLajmi, kryetari i Klinës Zenun Elezaj, i cili tha se shumica e territorit të kësaj komune ka qenë e përmbytur gjatë këtyre 2 ditëve.
Elezaj njoftoi se këtë të premte ka rënie të nivelit të ujit në Komunën e Klinës.
Tutje, ai theksoi se komuna ka ndihmuar në evakuuimin e qytetarëve gjatë ditës së enjte kur vërshimet veçse rrezikuan jetën e qytetarëve.
“Sot ka rënie të nivelit të ujit, pothuajse tërë territori i Komunës së Klinës ka qenë i përfshirë nga vërshimet, mirëpo mbrëmë komuna ka qenë në gjendje të ndërhyjë në kuptim të parandalimit, pastaj në evakuuim të qytetarëve. Në shumë lagje ka mbetur uji, por po bëjmë përpjekje për të hapur nënkalime, pasi shumica prej tyre janë të përmbytura”, tha ai për InLajmin.
Kryetari i Klinës njoftoi se dëmet nga vërshimet janë të mëdha, ndërsa theksoi se së shpejti do të formohet Komisioni për vlerësimin e këtyre dëmeve.
“Në Komunën e Klinës ka dëme të mëdha, të cilat po i evidentojmë nga terreni bashkë me përfaqësues të Qeverisë së Kosovës”, tha Elezaj.
Gjithashtu Elezaj tha se Komuna e Klinës e ka të vështirë të përballojë dëmet e shkaktuara nga vërshimet, andaj theksoi se do të kërkohet nga Qeveria e Kosovës që t’i dalë në ndihmë kësaj komune.
“Tani pritet të formohet edhe komisioni për vlerësimin e dëmeve, pastaj do të kërkojmë ndihmë edhe nga Qeveria e Kosovës për që të na dalë në ndihmë, pasi dihet se komuna në këto momente është e vështirë që të përballojë këtë situatë në aspektin financiar”. /InLajmi/
