24 vjetori i Masakres së Reçakut po kujtohet nga pothuajse të gjithë krerët institucional, të cilët si çdo vite edhe këtë herë po kërkojnë drejtësi për të gjithë të rënët për liri, përcjell InLajmi.
I pari i Partisë Demokratike të Kosovës, Memli Krasniqi tha se kjo masakër dëshmoi qartë qëllimin që shteti serb e kishte kundrejtë shqiptarëve të Kosovës.
Sipas Krasniqit vrasja e 45 civilëve në Reça nuk ishte rastësi, por gjithçka ishte e planifikuar deri në pikën e fundit dhe e gjithë skena u krye më gjakftohtësi nga forcat serbe.
Krasniqi tha se krimet që shteti serb ka kryer në Kosovë nuk do të harrohen asnjëherë dhe se për këto akte do të kërkohet drejtësi.
Postimi i plotë i tij:
Masakra e Reçakut, 24 vjet më parë, dëshmoi qëllimin dhe synimin e një politike gjenocidale dhe të orkestruar të Serbisë kundër shqiptarëve në Kosovë.
Vrasja e 45 civilëve në Reçak, në gjaktftohësi dhe me paramendim, ishte krim kundër njerëzimit – çka me të drejtë e cilësoi edhe Ambasadori William Walker.
Krimet ndaj popullatës civile shqiptare, gjatë luftës së viteve 1998/99, nuk do të harrohen asnjëherë dhe për to nuk do të heshtim derisa drejtësia të vihet në vend.
Sot, bashkë me kolegë e bashkëpunëtorë nga PDK, bëmë homazhe tek Kompleksi Përkujtimor në Reçak për të kujtuar viktimat e kësaj masakre.
Lavdi të përjetshme martirëve, dëshmorëve dhe heronjve të Kosovës!/InLajmi/
