Fotografi i njohur kosovar, Arian Mavriqi i cili është edhe fituesi i shumë çmimeve vendore dhe ndërkombëtare këtë javë vjen në një intervistë ekskluzive për Gazetën InLajmi.
Mavriqi në këtë intervistë foli rreth sfidave dhe eksperiencave të tij si fotograf profesional sikur edhe për planet e tij në të ardhmen.
InLajmi: Kur ka filluar pasioni juaj për fotografinë?
Arian Mavriqi: Që nga viti 2012 kam filluar te merrem me fotografinë, fillimisht fillova me një telefon celular Galaxy S4, mandej duke bërë foto e ndjeva se kam nevojë të shkoj tutje me investime në një kamerë profesionale sidomos për fotografi të kafshëve sepse me telefon thuajse ishte e pamundur.
InLajmi: A mund të ndani me ne eksperiencën më të mirë që e keni përjetuar gjatë fotografimit të një vendi, personi, apo qoftë edhe një moment që ju ka lënë mbresa?
Arian Mavriqi: Eksperienca më e mirë ishte një fotografi e Dhisë së Egër në Bjeshkët e Nemuna, sepse ishte fotografi e veçantë, sepse edhe ashtu quhet Mbretëreshë e Alpeve Shqiptare, dhe momenti kur e kam shkrep ishte shumë shumë mirë, prandaj edhe është nga fotografitë që e dua më së shumti. Plus asaj rrugës kur ishim duke shkuar takuam edhe ariun me 2 këlyshët e saj e që ishte një sfidë, sepse realisht në raste të tilla edhe mund të jetë agresive.
InLajmi: Jeni njëri nga fotografët profesional më të mirë në vend a mund të na flisni më shumë për këtë sukses?
Arian Mavriqi: Të jesh fotograf i njohur në trojet tona është sfidë, sepse njerëzit presin nga ti, dhe prandaj duhet punë dhe angazhim çdo ditë, pastaj ndoshta për dallim unë plus kam dokumentarin tim të botës së egër e që është i vetmi i tillë dhe që kërkon një përkushtim tepër të madh, sepse kemi të bëjmë me botën e egër, e që nuk është aspak e lehtë të sigurohet material për të realizuar një dokumentar të tillë. Përveç kësaj fotografitë gjithmonë kërkoj të jenë më unike dhe fokusohem te detajet që ndoshta jo secili mund ti vërej.
InLajmi: Sa është e vështirë të jesh fotograf profesional në Kosovë?
Arian Mavriqi: Në Kosovë për fat të keq fotografët nuk kanë mbështetje nga ana e shtetit, bile as ne të cilët i kemi sjell edhe informacione që nuk ishin në të dhëna shtetërore, sidomos për disa lloje të shpendëve, të cilëve natyrisht se ju duhet për databazë dhe pasurimin e arkivës me këto informata. Mandej për fat të keq akoma nuk ka një shoqatë që do merrej sidomos me mbrojtjen e të drejtave autoriale për fotografët të cilët shumë shpesh ju bëhet e padrejtë duke ju marrë foto pa leje dhe përdoren për qëllime të ndryshme.
InLajmi: Cilat janë objektivat tuaja për të ardhmen?
Arian Mavriqi: Kam shumë qëllime për të ardhmen, kemi shumë lloje që akoma na mungojnë në arkivën tonë sidomos të shpendëve të cilët duhet më shumë punë ti gjejmë e ti fotografojmë. Më është shtuar dëshira për të fotografuar gjëra unike në vende të ndryshme, sidomos pas vizitës që kisha në Safari në Afrikë. Dua të shkoj edhe në vende si Egjipti, Jordania, Turqia dhe shumë vende të tjera që të fotografoi nga atje, por edhe shumë pjesë të ndryshme në Shqipëri e në Kosovë.
Libona Gegaj /InLajmi/
