Ministria e Industrisë, Ndërmarrësisë dhe Tregtisë, ka njoftuar këtë të premte se Inspektorati i Tregut gjatë muajve të fundit ka shtuar numrin e inspektimeve për mbrojtjen e konsumatorit, në veçanti për mbikëqyrjen e etiketës që tregon flamurin e origjinës së produktit, përcjell InLajmi.
Në këtë njoftim thuhet se gjatë inspektimeve është konstatuar në disa raste shitësit vendosin etiketë mashtruese me flamur të një shteti, i cili nuk është flamur i origjinës së produktit, duke vendosur etiketa të flamurit të shteteve të Evropës në ato të shteteve fqinje.
Sipas njoftimit këto veprime janë gjobitur nga 1000 euro deri në 10000 euro si masë ndëshkuese, gjithashtu thuhet se inspektimet do të vazhdojnë dhe se ftohen qytetarët që të jenë të vëmendshëm gjatë blerjeve dhe të adresojnë ankesat në Inspektoratin e Tregut.
Njoftimi i plotë nga MINT:
Inspektorati i Tregut gjatë muajve të fundit ka shtuar numrin e inspektimeve për mbrojtjen e konsumatorit, në veçanti për mbikëqyrjen e etiketës që tregon flamurin e origjinës së produktit.
Gjatë inspektimeve është duke u konstatuar që në disa raste, shitësit vendosin etiketë mashtruese me flamur të një shteti i cili nuk është flamur i origjinës së produktit. Në rastet më të shpeshta është duke u vendosur etiketa e flamurit të shteteve të Evropës, në produktet që janë me origjinë të shteteve fqinje.
Në mbi 30 raste kur Inspektorati i Tregut ka konstatuar që shitësit nuk kanë vendosur etiketën apo kanë bërë ndërrim të etiketës së flamurit të origjinës së produktit, janë ndëshkuar me gjobë në vlerë prej një mijë (1,000) euro deri në dhjetë mijë (10.000) euro si masë ndëshkuese.
Me këtë rast ftojmë qytetarët-konsumatorë që të jenë të vëmendshëm gjatë blerjeve, dhe për çdo shkelje të të drejtave të konsumatorit, të vazhdojnë të adresojnë ankesat/njoftimet në Inspektoratin e Tregut, përmes Departamentit për Mbrojtjen e Konsumatorit në Ministri të Industrisë, Ndërmarrësisë dhe Tregtisë.
Inspektimet do të vazhdojnë edhe gjatë ditëve dhe muajve në vazhdim dhe për çdo keqpërdorim do të vazhdojnë të merren masa sipas ligjeve në fuqi./InLajmi/
