“Do të doja“, dhe “A më kujton“, janë disa nga këngët që përkundër viteve të publikimit vazhdojnë të jenë trendi të dëgjohen dhe të pëlqehen nga moshat të ndryshme. Krijuesi i këtyre hiteve, Naser Berisha në një intervistë ekskluzive për Gazetën InLajmi flet për sfidat e sukseset në karrierën e tij, sikur edhe dallimet në kohë mes artistëve dikur dhe tani.
InLajmi: Si ishte viti 2022 për ju në aspektin profesional?
Naser Berisha: Viti 2022 ishte një vit shumë shumë i suksesshëm për mua, pasi që në shkurt publikova albumin e 4-të me radhë pas plot 16 viteve, edhe pse ndër vite kisha publikuar shumë këngë dhe videoklipe, por albumi është diçka e veçantë. Pastaj gjatë vitit 2022 isha shumë i angazhuar në shumë mbrëmje muzikore në Kosovë dhe Shqipëri, e poashtu edhe shumë koncerte në sheshe, si në Kosovë por po ashtu edhe në Tiranë. Me një fjalë ishte një vit shumë i suksesshëm për mua, pasi që edhe në Spotify dhe në Youtube i kam kaluar të gjitha pritshmëritë në dëgjueshmëri.
InLajmi: Sa kanë dallim artistët sot me ata të para disa viteve?
Naser Berisha: Dallimi dhe çasja e artisteve ndaj artit dhe publikut natyrisht se ndryshon me kalimin e kohës. Por diçka që mbetet negative në këtë drejtim është sepse në kohën e sotme artistët më shumë i kushtojnë rëndësi dukjes dhe rrjeteve sociale në njërën anë dhe ne anën tjetër me shumë merren me kush sa klikime dhe like i ka, sesa me vetë artin që e prodhojnë. E kur jemi të klikimet ka vend për të diskutuar me orë të tëra, por kësaj radhe nuk po hy në këtë temë.
InLajmi: Kur do ta kemi një hit tjetër nga ju?
Naser Berisha: Unë pas publikimit të albumit i kam dhënë vetës pak pauzë me publikime të reja, sepse edhe ashtu isha shumë i angazhuar në mbrëmje muzikore e koncerte, kurse tash besoj se këtë vit do ti kem se paku 2 këngë të reja, e a do të bëhen hit varet nga dëgjuesit, kurse unë do të mundohem ta bëj më të mirën e mundshme.
InLajmi: Me cilin këngëtar nuk do të bashkëpunoje asnjëherë dhe pse?
Naser Berisha: Tek bashkëpunimi është paksa e komplikuar puna, sepse unë nuk jam një njeri që i them dikujt për bashkëpunim, por edhe fakti që vet nuk jetoj në Kosovë, e vështirëson kontaktin me artistët e tjerë në mënyrë që të vijë deri te një bashkëpunim natyral.
InLajmi: Cilat janë planet tuaja në aspektin profesional për vitin 2023?
Naser Berisha: Planet e mija për vitin 2023 siç e thash edhe më lartë janë që ti publikoj së paku 2 këngë dhe natyrisht të kem mbrëmje dhe koncerte gjatë kohës kur të jem në Kosovë. Për këtë fundvit nuk arrita që të jem në Kosovë. Në bazë të kërkesave që kamë pasur, kamë humbur shumë mbrëmje muzikore dhe xhirime në TV të ndryshme, por ndonjëherë vije kështu puna që nuk mundesh të jesh prezent në kohën më të mirë të vitit. Libona Gegaj /InLajmi/
