Për pasionin e tij për leximin, zhanret, autorët më të mirë, flet në një intervistë ekskluzive për InLajmin, 29-vjeçari nga Presheva, Zgjim Sherifi.
InLajmi: Si ka filluar pasioni juaj për leximin?
Zgjim Sherifi: Pasioni im për leximin ka filluar krejt rastësisht. Në shtëpi kemi shumë libra, dhe interesimi im është shfaqur që në klasat e ulëta të shkollës fillore. Ishte thjesht një shkendijë që e filloi krejt këtë aventurë.
InLajmi: Sa libra i keni lexuar këtë vit?
Zgjim Sherifi: Mund të tingëllojë e çuditshme, por unë nuk mbaj evidencë për librat e lexuar, e madje as nuk planifikoj se ç’lexime do të bëj këtë apo atë vit. Leximin e shoh si nevojë më shumë sesa statistikë! Dmth e shoh si nevojë të domosdoshme për mësimin e gjërave të reja, për stilin, për përmbajtjen, imagjinatën, autorin. Për mua libri është si një minierë e arit, ku ti futesh dhe pasurohesh, ose me fjalë të shkurtra, El Dorado.
InLajmi: Cili është libri që ju ka lënë mbresa më së shumti dhe që do t’ua rekomandoje të gjithëve që ta lexojnë?
Zgjim Sherifi: Janë disa libra që gjatë rrugëtimit të leximit, medoemos të lënë mbresa!
‘’100 vjet vetmi’’ i Gabriel Garsia Markezit, ‘’Kështu fliste Zaratustra’’ i Niçes, ‘’Shoqëria e sfilitur’’ e Byung-Chul Han, ‘’Siddharta’’, ‘’Ujku i stepës’’ nga Herman Hesse.
InLajmi: Cilat zhanre të librave i lexoni më shumë, për ju, cili autor është mjeshtër i atij zhanri?
Zgjim Sherifi: Nuk e kam një zhanër të preferuar, por mendoj që librat më të mire duhet lexuar, në vend të atyre të këqinj. Por Dostojevski, Kafka, Hesse, Kadare, Markez, T.S Eliot janë me të vërtetë mjeshtër të letërsisë.
InLajmi: Kush është personazhi i preferuar prej të gjitha librave që i keni lexuar?
Zgjim Sherifi: Më kujtohet një libër që e kam lexuar si fëmijë, ‘’Djemtë e rrugës Pal’’ të autorit Ferenc Molnar. Aty personazhi kryesor, Nemeçek, bashkë me shokët e tij luftojnë për territorin dhe se në fund ky personazh vdes! Për mua si fëmijë, kjo ka qenë shok i vërtete, sepse u pata lidhur shpirtërisht me personazhin dhe mbetet njëri ndër personazhet e mi të preferuar.
InLajmi: Nëse do të kishe mundësi të takoje një autor, cilin do të zgjidhje?
Zgjim Sherifi: Së pari do të doja ta takoja Arshi Pipën, kritikun dhe poetin më ektravagant shqiptar. Dostojevskin, që ta zbërtheja trurin e tij të veçantë, dhe pse jo ta pijmë nga një gotë raki me të. Hermann Hessen për zhdërvjelltësinë e tij dhe shpirtin e lirë, dhe gjithashtu Franc Kafkan, njërin ndër autorët më të mirë dhe më të veçantë të letërsisë. Dhe për fund, mos ta harroj është një autor japonez i mangave, Eiichiro Oda, i cili me mangan ‘’One Piece’’ ka një vend të veçantë tek une.
InLajmi: A ka ndonjë libër që është jashtëzakonisht i popullarizuar, por ju në njëfarë mënyre e keni anashkaluar për ta lexuar?
Zgjim Sherifi: Librat e popullarizuar në këtë kohë, globalisht, janë librat vetëndihmës, që mua thjesht nuk më tërheqin për lexim! Momentalisht, një autore amerikane Colleen Hoover është duke bërë gërrdinë në tregjet gloale te shitjeve të librave, por unë akoma nuk e kam lexuar. /InLajmi/
