Deputeti opozitar, Vladeta Jankoviq, e ka akuzuar Presidentin e Serbisë, Aleksandar Vuçiq, se “ka luajtur gabimisht” që nga fillimi e deri në fund, prej tërheqjes së “pamatur” të serbëve nga institucionet e Kosovës në pjesën veriore e deri te vendosja, heqja e barrikadave.
Deklarimet e Aleksandar Vuçiq se “po lufton për Kosovën”, Jankoviq i përktheu në “po lufton për ta mbajtur veten në pushtet”,
derisa veprimet që nga tërheqja e institucioneve i ka quajtur si “të përshtatshme për Kryeministrin e Kosovës, Albin Kurtin”.
“Serbët e gjorë vendosën t’i besojnë Vuçiqit dhe çdo herë u bëhet keq e më keq. Provuan të marrin disa shpjegime 24 orët e fundit, por rranë në rrafsh në fund. Sepse ai po bën gjënë e tij, dhe është i zënë në qoshe dhe s’mund të bëjë gjë tjetër”.
“E kuptoj atë, kur vjen dhe shtiret se është i dëshpëruar dhe që s’dorëzohet para presionit, por realiteti është se ai po lëshohet pak nga pak dhe ai momenti i së vërtetës po afrohet”, ka thënë Jankoviq, raportoi televizioni N1.
Në lidhje me formimin e Asociacioni të Komunave me shumicë serbe ai tha se është “fiksion” që nga Marrëveshja e Brukselit ndonëse thotë se “diçka do të bëhet”, e cila, sipas tij, do të jetë shumë larg idesë së autonomisë, përcjell Reporteri.net.
Mes tjerash ai foli edhe për proklamimet se gjoja do të ketë luftë, për çka tha se “për sa kohë NATO është aty, s’bëhet fjalë për luftë”.
