Ministrja e Drejtësisë, Albulena Haxhiu, ka raportuar në Komisionin Ad-hoc për Zhvillimin e Procesit të Vlerësimit Kalimtar, raporton InLajmi.
Haxhiu ka paraqitur pakon e dokumenteve për Zhvillimin e Procesit të Vlerësimit Kalimtar.
Ministrja tha se janë marrë për bazë rekomandimet e Komisionit të Venecias.
“Ne patëm kërkuar që ta kemi një opinion nga Venecia dhe opinioni i tyre ndonëse nuk e përkrah 100% atë që e ka propozuar Qeveria për një Vetting të përgjithshëm zë sistemit të drejtësisë, ne megjithatë kemi marrë për bazë ato vërejtje. Jemi pajtuar me rekomandimet e Komisionit të Venecias dhe e dimë që këto rekomandime nuk janë të obligueshme, ne e kemi bërë këtë, madje në seancën e Komisionit të Venecias ku u diskutua Projektligji për Byronë Kosovare të Konfiskimit të Pasurisë së Pajustifikueshme, morëm fjalë të mëdha nga komisioneri, i cili deklaroi se Kosova është shembull i marrje së rekomandimeve të Komisionit të Venecias”, tha Haxhiu.
Haxhiu theksoi se në plan të kësaj qeverie është edhe vettingu për sistemin e sigurisë.
“Është më e lehtë dhe siç e dini ne e kemi në program edhe Vettingun në sistemin e policisë. MPB është duke punuar në këtë drejtim dhe rrethanat në veri ka bërë që mos të dakordohemi më shumë në këtë proces. Është më lehtë sepse nuk ka nevojë për ndryshime Kushtetuese”, tha ajo. /InLajmi/
