Kryetari i Kuvendit të Maqedonisë së Veriut, Talat Xhaferi, pas takimit me kryetarin e kuvendit të Kosovës, Glauk Konjufca e përgëzoi Kosovën për aplikimin për anëtarësim në Bashkimin Evropian, përcjell InLajmi.
Xhaferi apeloi te vendet anëtare të BE-së që të mbështesin aplikimin e Kosovës për anëtarësim, ai gjithashtu shtoi se do të jenë gjithmonë përkrahje e fuqishme e aspiratave euroatlantike të Republikës së Kosovës.
Ai tha se ballkani perëndimor është i integruar tërësisht në BE dhe në NATO është garanci për paqen dhe stabilitetin në rajon.
Kujtojmë se, të mërkurën është bërë hapi zyrtari Kosovës në rrugën drejt anëtarësimit në Bashkim Evropian, me nënshkrimin e aplikimit për anëtarësim të Kosovës në BE.
Postimi i plotë i tij:
Gjatë takimit me Kryetarin Konjufca para disa ditëve në Kuvend e pohova qëndrimin e Republikës së Maqedonisë së Veriut dhe të institucioneve vendore se ne do të jemi gjithmonë përkrahje e fuqishme e aspiratave euroatlantike të Republikës së Kosovës, sepse konsiderojmë se vetëm Ballkani Perëndimor i integruar tërësisht në BE dhe në NATO është garanci për paqen dhe stabilitetin në rajon dhe lajmi për dorëzimin e aplikimit nga ana e Republikës së Kosovës për anëtarësim në Bashkimin Evropian është hapi kryesor që duhet të ndërmerret për të filluar këtë rrugëtim. Edhe lajmi për liberalizimin e vizave për qytetarët e Republikës së Kosovës është sukses historik dhe Ju – ia dolët!
Ju përgëzoj dhe uroj sukses në përmbushjen e detyrimeve të procesit dhe apeloj te vendet anëtare të BE-së që të mbështesin këtë aplikim që është reflektim i qartë i vullnetit të qytetarëve dhe institucioneve kosovare./InLajmi/
