Po flitej për dialogun deri në momentin kur kryeministri i Kosovës Albin Kurti mori vendimin për largimin e targave ilegale të makinave të qytetarëve serbë të Kosovës, shkruan InLajmi.
Me këtë vendim nuk u pajtua presidenti serb Aleksander Vuçiq, i cili tha se Kurti po “nxiste” tensione.
Që nga ajo kohë situata në veri të Kosovës vetëm sa u përshkallëzua.
Si rezultat i kësaj, 4 kryetarët e komunave veriore dhanë dorëheqje, e bashkë me ta edhe zyratët policorë serbë, që shërbenin në Policinë e Kosovës.
Kjo listë u ndoq edhe nga zyrtarët e gjykatës në Mitrovicë dhe nga Lista Serbe, e cila u tërhoq nga Kuvendi i Kosovës.
Presidentja e Kosovës, Vjosa Osmani pas konsultimit me partitë opozitare në vend vendosi që 18 dhjetori të jetë data për mbajtjen e zgjedhjeve të jashtëzakonshme për kryetarë të 4 komunave veriore.
Pati takime e bisedime mes palëve kosovare e atyre serbe, derisa arritën në një marrëveshje për targat: Serbia nuk do të lëshonte më targa me akronime qytetesh, kurse Kosova nuk do të gjobiste vozitësit që posedonin targa të tilla.
Por kjo nuk i dha fund tensioneve në Mitrovicën e Veriut. Përfundrazi, situata u përshkallëzua edhe më shumë.
Ndërsa kishin filluar përgaditjet për këto zgjedhje të martën në Zubin Potok u raportua për shpërthime me granata dore, ku ishin sulmuar zyret e Komisioit Qendror të Zgjdhjeve.
Pas këtij shpërthimi ambasadori amerikan, Jeffrey M. Hovenier deklaroi se nuk ka kushte për mbajtjen e këtyre zgjedhjeve.
“Shtetet e Bashkuara të Amerikës janë të shqetësuara për incidentin që ndodhi në veri të Kosovës. Siguria është primare në këtë kohë dhe nuk mendojmë se ka kushtë të volitshme për zgjedhje, siç është planifikuar” tha Hovenier.
Sulmin ndaj zyreve të KQZ-së në Mitrovicën e Veriut e komnetoi edhe ambasadori gjerman Jorn Rohde, i cili tha se protestat paqesore janë tjetër gjë, kurse dhuna nuk duhet toleruar.
“Mbështetje të pafund për protestat paqësore, por zero tolerancë ndaj dhunës” theksoi Rohde.
Përderisa mbrëmjen e së merkurës dukej që situata ishte qetësuar në veri të vendit, rreth orës 20:50 dëshmitar të rastit kanë njoftuar Policinë e Kosovës së është dëshuar një shpërthim tjetër në Lagjen e Boshnjakëve në Mitrovicë.
Policia e Kosovës dhe EULEX-i kanë dalur menjëherë në vendin e ngjarjes.
Ndërsa Ministri i Brendshëm, Xhelal Sveçla tha se dyshohet se një pjesë e këtyre sulmeve janë bërë nga ish-pjesëtarët e Policisë së Kosovës.
“Kemi të dhënat e para të mbledhura nga terreni, nga policia e rendit dhe inteligjenca, e cila thotë se një pjesë e këtyre kriminelëve vijnë nga radhët e ish pjesëtarëve të policisë së Kosovës”, deklaroi të mërkurën, Ministri i Punëve të Brendshme, Xhelal Sveçla.
Forcat e KFOR-it, Detashmenti i Asgjësimit të Mjeteve Shpërthyese, me seli në Kampin Bondsteel, ka asgjësuar një granatë dore jugosllave të tipit M-75 brenda një ndërtese në Mitrovicën e Veriut, më saktësisht afër Prokurorisë Themelore në Lagjen e Boshnjakëve.
KFOR-i zotohet se do të garantojë një mjedis të sigurt dhe lirinë e lëvizjes për të gjitha komunitetet duke u bazuar në Rezolutën 1244.
Komandanti i trupave të KFOR-it, Angelo Michele Ristuccia ka deklaruar se ngjarjet e fundit në Mitrovicën veriore janë brengosëse sidomos tani në prag të zgjedhjeve.
“Detyra jonë e parë është sigurimi i lëvizjes së lirë në Kosovë. Jemi të pajisur për t’u ballafaquar me një situatë të tillë. Por, ne veprojmë në pajtim me situatën në mënyrën më të mirë të mundshme, duke reaguar ndaj cilësdo situatë që e kemi përpara. Nuk e tolerojmë dhunën dhe pikë. Dhunën nuk mund ta tolerojmë dhe nuk do ta tolerojmë”, ka theksuar Ristuccia.
Në fund, gjenerali italian ka dhënë edhe një mesazh për popullin e Kosovës dhe në përgjithësi për popujt e Ballkanit Perëndimor.
“Asnjëherë të mos e ndalin ëndrrën dhe të mos humbin shpresën për një të ardhme më të mirë. Të mos ndjekin dezinformatat toksike. Le të përpiqemi të gjejmë burime të tjera dhe t’i ballafaqojmë ato e jo t’i bartim ashtu siç janë. Pra, të mos ndjekim narrativa toksike”, ka shtuar Ristuccia.
Presidenti i Serbisë Aleksandër Vuçiq “kërcënoi” se do të sjellë trupat policre e ushtarake në Mitrovicën e Veriut.
I menjëhershëm ishte reagimi i Presidentes së Kosovës, e cila theksoi se kjo nuk do të ndodhë kurrë.
Ditën e shtunë, ish-pjesëtari i Policisë se Kosovës, Dejan Pantiq, u ndalua në pikën kufitare në Jarinjë, nën dyshimin se ka kryer vepër terroriste duke sulmuar zyret e KQZ-së në veri të vendit.
Mbrëmjen e së shtunës serbët vendosën barrikada në Mitrovicë për të penguar dërgimin e Pantiq-it në stacionin policor ne Kosovë.
Patrulla të Policisë së Kosovës dhe KFOR-it qëndruan gjatë gjithë ditës në pika të caktuara në qytetin e Mitrovicës, me qëllim parandalimin e shkaktimit të trazirave.
E pikërisht ditën e shtunë, presidentja e Kosovës, Vjosa Osmani, pas takimit urgjent që zhvilloi me përfaqësuesit e partive të vendit, në një konferencë për media deklaroi se për shkak të kushteve të pafavorshme zgjedhjet e jashtëzakonshme në veri të Kosovës janë shtyrë për datën 23 prill të vitit 2023.
Shtetet e Quint-it Dhe SHBA-të e përshendëten këtë vendim dhe deklaruan se është konstruktiv dhe i qëlluar.
Kurse nënkryetarja e PDK-së, Vlora Çitaku e fajësoi qeverinë për dështimin e mbajtjes së këtyre zgjedhjeve./InLajmi/
