Kryetari i Partisë Demokratike të Kosovës, Memli Krasniqi, ditën e premte ka takuar udhëheqësit e Korporatës së Sfidave të Mijëvjeçarit (MCC), përcjell InLajmi.
Ai tha se në këtë takim u diskutua rreth mbarëvajtjes së programeve investive të kësaj organizate në Kosovë.
Krasniqi falënderoi investimet nga programi Threshold ku e ka cekur lagjen e tij të fëmijërisë Ulpiana e cila falë MCC ka marrë një pamje të re, ai gjithashtu shtoi se PDK-ja përkrahë plotësisht proceset e programit të ardhshëm Compact.
Kryetari i PDK-së gjithashtu shtoi se është për keqardhje fakti se Kosova ka mbyllur derën për investimet e nevojshme përmes MCC-së në prodhimin e rrymës përmes gazit.
Postimi i plotë i tij:
Sot, në Washington DC, u takova edhe me udhëheqësit e Korporatës së Sfidave të Mijëvjeçarit (MCC), për të diskutuar mbarëvajtjen e programeve investive të kësaj organizate në Kosovë.
Shpreha falënderimin e thellë për investimet e deritashme nga programi Threshold, veçanërisht ato që ishin të fokusuara në efiçencë. Edhe lagjja ime e fëmijërisë Ulpiana sot ka marrë një pamje të re falë MCC-së.
PDK do të përkrah plotësisht proceset e programit të ardhshëm Compact, por është për keqardhje që Kosova ka mbyllur derën për investimet shumë të nevojshme përmes MCC në infrastrukturën e gazit dhe në prodhim të rrymës përmes gazit.
Kosova ka nevojë për strategji afatgjate për sektorin e energjisë dhe çdo vonesë në hartimin dhe zbatimin e saj shkakton vonesa në adresimin e krizës energjetike dhe në sigurinë e furnizimit – faturën e rritur të së cilës do ta paguajnë qytetarët./InLajmi/
