Nënkryetari i Lidhjes Demokratike të Kosovës, Lutfi Haziri ka reaguar ndaj deklaratave të kryeministrit të vendit Albin Kurtit, i cili në 2 intervista kishte thënë se Kosova rrezikohet nga një luftë e mundshme nga Serbia, përcjell InLajmi.
Haziri tha se nuk ka nevojë të nxitet frika për luftë, por tani është koha që duhet të sillen vendime të vështira. Gjithashtu ai tha se rëndësia e delegacionit në këtë rrafsh është e madhe.
Nënkryetari i LDK-së theksoi se Kosova e ka si garancion NATO-n.
Tutje ai tha se kjo qeveri ka një mal me fjalë, ajo ka politikën e një hapi para e 2 mbrapa.
Postimi i plotë i tij:
S’ka nevojë të nxisin frikë për luftë, koha e vendimeve të vështira
Politikanëve iu vjen momenti që duhet të sjellin vendime të vështira dhe ajo kohë po vjen për Kosovën. Në këtë rrafsh përparësia e delegacionit tonë në tavolinën e dialogut është e madhe dhe nuk ka nevojë të mbrohemi, por nuk kemi nevojë as të shtrojmë frikë tek njerëzit, brenda dhe jashtë Kosovës se ‘Serbia do të mund nesër të zbarkojë në territor të Kosovës me forca ushtarake apo policore’.
Kosova e ka një garancion, NATO-n, duke përfshirë edhe kapacitetet tona që janë duke u ndërtuar dhe këto e bëjnë të qartë që nuk po kërcënon lufta, por po kërkohet dialogu, po kërkohet zgjidhja.
Duhet të demonstrohet që Kosova e 17 shkurtit 2008 është Republikë parlamentare, e cila garanton siguri dhe paqe për fqinjët, siguron demokraci dhe zhvillim për popullin e saj pavarësisht etnisë dhe argumentin më të fortë që e kemi pasur është që ne nuk jemi dhe nuk do të jemi kërcënim për askënd.
Deri tani, kjo qeveri deklarativisht ka një mal me fjalë, por në veprim kemi hezitime dhe kemi politikën e një hapi para e dy mbrapa. Pra, nuk ka progres drejt arritjes së atyre synimeve e premtimeve që i kanë dhënë.
Fatkeqësisht, edhe në rrafshin e brendshëm e edhe atë të jashtëm kjo qeveri ka treguar mungesë të lidershipit, mungesë të guximit politik për t’i zgjidhur problemet. Tash e 1 vit e gjysmë, nuk kemi qeverisje, por administrim. Është e papranueshme që VV e riktheu administrimin që e kemi lënë pas më 17 shkurt 2008 dhe Kosova po vuan nga kjo mënyrë e udhëheqjes. /InLajmi/
