Shqyrtimi i Projektligjit për rregullimin e çmimit të produkteve medicinale, nuk ka kaluar pa debate e përplasje mes pozitës e opozitës, ndërsa debat më i “nxehtë” u zhvillua ndërmjet deputetëve inicues të projektligjit, PDK-së dhe atyre të mazhorancës, raporton InLajmi.
Debati filloi pasi deputetët e PDK-së, akuzuan mazhorancën për mos përfillje të propozimeve për plotësimin e Projektligjit për rregullimin e çmimit të produkteve medicinale.
Në gjithë debatin e zëshme ishte deputetja e PDK-së Floretë Zejnullahu e cila kujtoi rëndësinë e projektligjit si masë parandalues të abuzimit me çmimet e medikamenteve dhe produkteve midicinale.
E zëshme ishte deputetja Deputetja Floretë Zejnullahu e PDK-së, si parti iniciuese e projektligjit ka thënë se Qeveria s’i ka marrë parasysh propozimet e kësaj partie opozitare.
“Ky projektligj ka për qëllim rregullimin e çmimeve dhe ndaljen e abuzimeve me to nga kompanitë farmaceutike. Projektligji përcakton çmimin fiks për shitje të produkteve me shumicë dhe pakicë”, tha Zejnullahu.
Tutje ka theksuar Zejnullahu se Qeveria s’i ka marrë parasysh propozimet e tyre, vetëm pse projektligji ka ardhur nga një parti opozitare.
“Qeveria e ka lënë qytetarin pa remdesivir në pikun e pandemisë dhe qytetarët kanë shpenzuar një milion euro në blerjen e këtij bari. Ky projektligj ka për qëllim rregullimin e çmimeve dhe ndaljen e abuzimeve me to nga kompanitë farmaceutike. Projektligji përcakton çmimin fiks për shitje të produkteve me shumicë dhe pakicë”, ka thënë Zejnullahu
Ndaj deklaratave të deputetes Zejnullahu, i menjëhershëm ishte reagimi i deputeti i LVV-së, Besim Muzaqi, i cili tha se është PDK-ja ajo e cila ka çrregulluar tregun e barnave.
“Pse nuk e keni sjellë në Kuvend këtë projektligj për 20 vjet? Pranojeni që nuk e kishit qëllim e as tash nuk e keni qëllim, por keni interes për përshtatjen e çmimeve me kompanitë ku ju keni hise. Mos krijoni iluzione të shtyni agjenda tuajat në kundërshtim me interesin e qytetarëve në Qeverinë e Albin Kurtit. Nuk do të lëshohem në përmbajtje sepse aty ka gabime elementare. LVV-ja ka qenë gjithmonë e zëshme për ta rregulluar këtë çështje, por jo si ju”, ka thënë Muzaqi.
Pas Muzaqit, fjalën e mori përsëri deputetja Zejnullahu e cila theksoi se ligji është në përputhje me direktivat e Bashkimit Evropian e se është për t’i ndalur abuzimet në sektorin e farmacisë.
Më i butë në diskutim ishte deputeti i LDK-së, Armend Zemaj, ish-ministër i Shëndetësisë, i cilia tha se kjo fushë duhet të rregullohet me ligj me domosdoshmëri.
“Në mandatin e deputetëve është edhe hartimi i ligjeve edhe ky ligj është hartuar dhe ka shkuar ne Qeveri për mendim. Por, nuk duhet të akuzohet se është bërë ligj i keq sepse deputetët këtë punë kanë të bëjnë ligje dhe nëse nuk janë të mira e kemi mundësinë e përmirësimit të tyre. Ne e përkrahim këtë projektligj”,ka thënë Zemaj.
