Pas krijimit të 2 Komisioneve Hetimore, atij të pozitës dhe opozitës, lidhur me hetimin e menaxhimit të krizës energjetike, deputeti i Lëvizjes Vetëvendosje Eman Rrahmani thotë se duhet të merren masa ndaj atyre që kanë keqmenaxhuar.
Rrahmani theksoi se deri tani ka vetëm akuza politike, e jo ndonjë argument i ofruar se ka pasur keqpërdorime në Korporaten Energjetike të Kosovës.
“Tash po mendojmë që janë kriju Komisionet Hetimore, ato duhet ta kryejnë punën e tyre në mënyrën më të mirë qoftë prej opozitës qoftë prej pozitës, duhet të bëhet hetim dhe jo amnistim nga kushdo që janë bërë. Dhe në qoftë se ky Komision arrin të gjejë shkelje ose keqmenaxhime ato duhet t’i faktojë dhe t’i drejtojë drejt Prokurorisë që të merren masa ndaj tyre qe kanë keqmenaxhuar. Mirëpo deri tash janë vetëm akuza politike më shumë sesa që është ofruar ndonjë argument apo ndonjë fakt se ka pasur keqpërdorime të tilla”, tha Rrahamani.
Deputeti i LVV-së foli edhe për konkursin e punësimeve në Korporatën Energjetike të Kosovës (KEK), për të cilin pati shumë akuza se ka qenë “me të njohshëm”.
Për këtë, Rrahmani theksoi se e kupton “hallin e opozitës”, pasi siç thotë ai, tani nuk ka punësime të kurdisura.
“Unë hallin e opozitës e di, është vështirë 20 vite me qenë në pushtet çdo herë me pas punësime të kurdisura dhe kur bjen një moment që punësimit, ne nuk mund t’i kurdisim por punësohen ata që janë më meritorët, pa marrë parasysh me çfarë aktivizmi politik ose cilit subjekt i takojnë ose mbështetës të kujt janë”, shtoi Rrahmani, shkruan Tëvë1.
Rrahmani potencoi se secili që ka punësuar qytetarë në KEK pa përmbushje të kritereve, duhet të përgjigjet para drejtësisë
