Kreu i AAK-së, Ramush Haradinaj ka thënë se nuk është problem vetëm te rritja e çmimit të naftës, Kosova është shumë më e komplikuar, përcjell InLajmi.
Ai ka bërë të ditur se kanë nisur procedurën e tyre drejt Gjykatës Kushtetuese, për siç e quajnë ata ‘’diskriminim e Qeverisë’’ për mosmiratimin e Ligjit të Pagave dhe rritjen e pagës minimale.
Tutje ai i është drejtuar kryeministrit Kurti duke i thënë se populli nuk ushqehet as me ideologji e as me ëndrra i cili theksoi se kanë vdek ato kohëra kur populli është ushqyer me ideologji.
Ndër të tjera Haradinaj tha se nuk do të ndalen së demaskuari këtë qeveri sipas tij të dëmshme deri sa ajo të merr parasysh fuqinë opozitare në Kuvend.
Postimi i plotë i tij:
Kryeministër, nuk ushqehet populli me ideologji
Situata në Kosovë ështe shumë më e komplikuar, nuk është veç punë nafte e punë akcize.
Qytetari i këtij vendi po përballet me pamundësinë me siguru ekzistencën, po rriten çmimet e gjithë artikujve të jetesës, rryma, nafta, vaji, sheqeri, buka, ilaçet edhe gjithçka tjetër.
Kemi qenë të shqetësuar gjatë gjithë këtyre muajve të veprimeve të kësaj qeverie antipopullore. Ka më shumë se 6 muaj që bëjmë presion te kjo qeveri ta miratojë Ligjin e Pagave dhe rritjen e pagës minimale, e s’ka asnjë veprim. Përkundrazi ajo e rritë çmimin e energjisë për qytetarët shqiptarë, ndërkaq për serbët në veriun e vendit, vendos me ua pagu rrymën nga buxheti i shtetit.
Sot, e kemi nisë procedurën që këtë diskriminim ta dërgojmë në Gjykatën Kushtetuese, si shkelje e rëndë e të drejtave të njeriut.
Përfundimisht, situata në Kosovë kurrë nuk ka qenë më e rëndë, edhe në aspektin e ekzistencës e edhe të sigurisë. Kryeministri në vend që të veprojë po mbanë fjalime letrare dhe filozofike në Kuvend.
Nuk ushqehet populli as me ideologji e as me ëndrra. Nuk mashtrohen njerëzit me fjalë të bukura. Nuk mbahet shpija me llafe. Qeveria po kujton se mund të tallet me qytetarët e vendit, duke i lajthitur me do farë “epopeshë të arsimit”. Kanë vdekur sistemet kur popujt janë ushqyer me ideologji dhe me artin e kulturën që e kanë prodhuar ato, e të cilat kryeministri Kurti po i përdorë me aq paftyrësi.
Prandaj, ne nuk e kemi ndërmend të ndalemi së demaskuari këtë qeveri të dëmshme, pa marrë parasysh fuqinë tonë opozitare në Kuvend, por gjithnjë me shpresë se do të rritet populli opozitar që nuk do të bie pre e mashtrimeve dhe fjalëve të bukura të Kryeministrit, e që herëdokurë do t’ia japë përgjigjen që e meriton./InLajmi/
