Liljana Sema kishte 3 ditë që kishte vdekur, kur u gjet e pajetë nga vëllai i saj Baçi Gjoleka. Ai bashkë me nipin e tij treguan për mediat se 66-vjeçares kishte 10 ditë që ia kishin shkëputur energjinë elektrike pasi nuk kishte pasur mundësi që ta paguante.
Liljana jetonte në kushte të vështira, në një banesë thuajse të shkatërruar dhe çfarëdo që të binte jashtë hynte dhe brenda. Ajo ka 3 fëmijë, 2 prej të cilëve jetojnë në Itali dhe një djalë i cili jeton larg.
I biri tregoi se vetëm disa kohë më parë i kishte blerë një ngrohëse për ditëlindje, por as atë nuk kishte një prizë ku mund ta vinte. Kurse, motra e Liljanës tregon për kushtet e vështira në të cilat ajo jetonte, duke mos pasur askënd që t’i vinte në ndihmë.
“Motra ime u martua, bëri 3 fëmijë. Me kushte të vështira, burri dhe vetë e sëmurë. Fëmijët s’i kishte mirë fare. Nuk e ndihmonin fare, mblidhte kanaçe nga Ferrasi në Novoselë. Në atë kasolle ka dhënë shpirt nga i ftohti, sepse ç’binte jashtë hynte brenda. Na iku e re.”
Baçi Gjoleka thotë se sipas mjekëve, e motra ndërroi jetë si pasojë e të ftohtit.
“Jam i vëllai. Ne e gjetëm të ngrirë. Ia kishin hequr dritat, kishte 10 ditë. Nuk kishte lekë t’i paguante. Doktori tha është ngrirë nga i ftohti. Nuk ndihmohej nga askush”, tha ai, transmeton abcnews.al.
Liljana Sema 66 vjeç ndërroi jetë ndërsa ndodhej e vetme në shtëpi kur i gjithë vendi ishte i mbërthyer nga i ftohti ekstrem me temperaturat që shkuan deri në -17 gradë.
