Agjencia e Ushqimit dhe Veterinarisë implementoi një projekt për kontrollimin e qenve endacakë.
Gjatë periudhës një vjeçare sa edhe zgjati projekti maj 2020 dhe maj 2021 ajo trajtoi diku 9 mijë sosh.
“Projekti ka qenë angazhim shtesë me mjete buxhetore të AUV-së qe kap shifrën rreth 750 mijë euro. Nga të gjitha organizatat dhe ambasadat kemi marrë vlerësime të mira për punën qe është realizuar ku është arritur trajtimi i rreth 9 mijë qenve endacakë”, deklaroi Lamir Thaçi, zëdhënës në këtë institucion.
Por, puna që ky institucion bëri po del të jetë e pamjaftueshme.
Tash kur ka pak ditë qëkur ka nisur 2022-shi, prishtinasit po përballën prapë me problemin e vjetër.
Hall i moçëm i tyre janë qentë endacakë prej të cilëve thonë se ndihen të rrezikuar.
Ata pothuajse përditë dërgojnë fotografi me grumbuj të këtyre kafshëve që enden në kryeqytet.
Si këto, të shkrepura të hënën e 10 janarit 2022.
Këtë telashe s`e kanë veç prishtinasit, por edhe banorët e komunave tjera.
Për këtë janë të vetëdijshëm nga AUV-i. Andaj premtojnë se do t`ia gjejnë zgjidhjen njëherë e mirë.
“Ne synojmë të vazhdojmë punën rreth problematikës se qenve endacak. Për të mbështetur komunat në zgjidhjen e përhershme të kësaj problematike”, tha Lamir Thaçi, zëdhënës në këtë institucion.
Gjatë 2021-s nuk kanë munguar rastet kur qytetarët janë kafshuar nga qentë.
Rreziku kryesor i kafshimit nga qeni, sipas infektologëve Entela Kolovani e Rovena Byku, është ai i një plage që lë shenja të shëmtuara dhe të rënda.
Sipas një shkrimi të tyre, kafshimi provokon një plagë pak a shumë të madhe e të thellë, me dhimbje dhe skuqje në zonën rrethuese, shkruan FrontOnline.
Në qoftë se agresori është një qen i egër apo i panjohur, ka mundësi që të marrim sëmundjen e tërbimit të qenit, një sëmundje virale që shkakton encefalit vdekjeprurës.
