Linjat ajrore në të gjithë botën kanë anuluar më shumë se 8.000 fluturime gjatë fundjavës treditore të Krishtlindjeve dhe kësaj të hëne për shkak të përhapjes së variantit Omicron, i cili ka prekur edhe një pjesë të stafeve të aeroporteve.
Vetëm ditën e hënë u anuluan 1639 fluturime të tjera.
United Airlines shpjegoi në një deklaratë se rritja e rasteve të Omicron “kishte një ndikim të drejtpërdrejtë” në ekuipazhet e tyre të fluturimit dhe njerëzit që drejtojnë ato.
“Si rezultat, për fat të keq na është dashur të anulojmë disa fluturime dhe po i njoftojmë klientët e prekur përpara se të vijnë në aeroport”, tha kompania.
Linjat e tjera ajrore si Lufthansa po vuajnë gjithashtu mungesën e stafit pasi gjithnjë e më shumë pilotë dhe anëtarë të ekuipazhit të kabinës rezultojnë të infektuar ose detyrohen të karantinohen me mbërritjen në vende të caktuara, shkruan Euronews.
Linjat ajrore kineze, veçanërisht China Eastern dhe Air China, anuluan më shumë se 2.000 fluturime vetëm gjatë fundjavës tre-ditore, shumë prej tyre drejt Xi’an, ku 13 milionë njerëz janë aktualisht nën izolim.
