Ish-deputetja e Lidhjes Demokratike Melihate Termkolli, mori pjesë në protestën e sotme të organizuar nga Sali Berisha kundër Ballkanit të Hapur, takimi i radhës i të cilit mbahet sot e nesër në Tiranë.
“Ballkani i Hapur do të thotë një Jugosllavi e re. Është përpjekja e fundit e Vuçiqit që të realizojnë planet e tij. Por kjo nuk do të ndodhë, për këtë është kalaja Kosovë”, tha Termkolli.
“Vuçiq është ndër kritikuesit më të mëdhenj të Millosheviçit, e kritikon se nuk përfundoi gjenocidin kundër shqiptarëve, sepse nuk i hodhi në det shqiptarët e të merrte Kosovën”, deklaroi tutje Tërmkolli.
Ajo tha gjithashtu se në Kosovë ka zëra të disa mbështetësve të George Soros, që vendi mund ta pranojë Ballkanin e Hapur, nëse Serbia e njeh Kosovën, por ajo tha se kjo nuk do të ndodhë kurrë, raporton A2CNN.
“Edi Rama bën mirë ta shpallë nul këtë pakt, nuk e duron Kosova, nuk e durojnë shqiptarët. Amerika është me popullin shqiptar, ndërsa shqiptarët janë me Sali Berishën. Shqiptaria ka 2 liderë dhe prijës historik, Dr. Ibrahim Rugova dhe Dr. Sali Berisha”, tha ajo.
