Ish-kryeministri Sali Berisha ka shkuar tek zyrat e FRPD, aty ku të rinjtë e Partisë Demokratike kanë denoncuar se janë kërcënuar me armë në zyrat e tyre nga persona të panjohur. Në një deklaratë për mediat, Berisha u shpreh se ky është një akt i shëmtuar.
“Këta të rinjtë ka thanë se kanë ardhur dhe i kanë kërcënuar me armë. Bandat e armatosura kanë kërcënuar të rinjtë e PD. Njerëzit që kërcënojnë të rinjtë po bëjnë një krim të shëmtuar. Gjithçka do bëjmë që të ngremë këtë parti që ta kthejmë në vlerat që i takon. Ky është një akt shumë i shëmtuar”, tha Berisha.
“Një finale e turpshme deri në kriminale, ka mbushur selinë me banda të armatosura. Banditë me armë kanë kërcënuar të rinjtë e FRPD në zyrat e tyre. E dënoj me forcën më të madhe këtë qëndrim kriminal, që dëshmon fytyrën e vërtetë të njeriut që për karrigen e tij ka marrë peng PD. E garantoj se do mbahet përgjegjës për çdo akt dhune, që do ushtrojnë banditët e tij në Tiranë e në mbarë Shqipërinë. U bëj thirrje të gjithë demokratëve të distancohen nga këto akte të turpshme që s’kanë ndodhur kurrë në historinë e PD as ditën e themelimit”, shtoi më tej Berisha.
Kjo deklaratë e Berishës vjen pak minuta pasi është njoftuar se është grabitur zyra e Belind Këlliçit, ish-kryetar i Forumit Rinor të Partisë Demokratike, raporton Tv Klan.al.
Vetë Këlliçi ka bërë denoncim në polici dhe është shprehur se është në pritje të ardhjes së uniformave blu për kryerjen e ekspertizës.
