Kryeministri Kurti është takuar me komandantin e ri të FSK-së, Bashkim Jashari, cili i ka dëshiruar punë të mbarë në detyrën e tij, përcjell InLajmi.
Kurti ka shkruar se ushtria jonë është e re, por me pjekuri të thellë e histori të lavdishme.
Tutje ai ka falënderuar Gjenerallejtnant Rrahman Ramën për kontributin e tij, gjatë detyrës së tij si gjeneralmajor në FSK.
Postimi i plotë i tij:
Ushtrisë që i shërben popullit, i duhet ushtari me zemrën plot dashuri për atdheun, ushtari që të përbashkëtën e vetëmohimin i lartëson në detyrën që i besohet, ushtari që të ardhmen e sheh përmes idealit të dëshmorit. Të gjitha këto vlera i zotëron gjeneralmajori Bashkim Jashari, nipi i Komandantit Legjendar, i Kryekomandantit Adem Jashari. E, nga sot ai është Komandant i Forcës së Sigurisë së Kosovës.
Ushtria jonë është e re, por me pjekuri të thellë e histori të lavdishme. Vazhdimësia e Ushtrisë Çlirimtare të Kosovës, përmes Forcës së Sigurisë së Kosovës, është shtylla jonë e fortë mbi gurthemelin e Republikës.
Komandantit Jashari i dëshiroj punë të mbarë në detyrën e tij të re. Gjenerallejtnant Rrahman Ramën e falënderoi për kontributin e tij dhe po ashtu i dëshiroj suksese në angazhimin e mëtutjeshëm si përfaqësues yni në RACVIAC./InLajmi/
