Presidentja e Kosovës, Vjosa Osmani së bashku me homologun slloven kanë mbajtur konferencë të përbashkët për media pas takimit të tyre, raporton InLajmi.
Gjatë kësaj konference Presidentit të Sllovenisë, Borut Pahor, ia mori vëmendjen fotografia e presidentit të parë të Kosovës, Ibrahim Rugova.
Pas që e pa këtë fotografi Pahor ka thënë se ia kujtoi takimet me Rugovën, ndërsa tha se e pyet veten se si do të sillej ai në rrethanat aktuale me të cilat po përballet Kosova.
“Po e shoh fotografinë e Ibrahim Rugovës këtu. I kujtoj takimet e shumta me të dhe e pyes veten, në këto rrethana, ai a do t’i shihte këto probleme si mundësi për zhvillimin e Kosovës, për të ardhmen e saj, apo do t’i shqyrtonte ndryshe”, tha Pahor.
Pahor e ka quajtur Rugovën burrë shteti, ndërsa tha se është i bindur se përkundër të gjitha problemeve, ai do të shihte mundësi për t’i zgjidhur ato.
“Sa kam pasur mundësinë ta njoh këtë burrë shteti, jam i bindur se përkundër të gjitha problemeve që i ka Kosova, ai do të shihte shumë mundësi për zgjidhjen e problemeve. Dhe ai do të bënte që ky vullnet të punonte për të gjithë”, u shpreh presidenti slloven.
Nga ana tjetër Osmani tha se Rugova është udhërrëfyes për të dhe se është rritur me frymën e tij.
“Presidenti Rugova është udhërrëfyes jo vetëm i imi, por besoj i secilit qytetar e politikan që beson në Kosovën e pavarur dhe sovrane. Ne jemi vërtet mirënjohës për gjithë miqësinë që ia keni ofruar atij në kohë të vështira dhe gjithë Kosovës. Si një person që është rritur me frymën e tij, dua ta rikonfirmoj që presidenti Rugova qysh në vitin 1991 i ka thënë jo shumë ideve që synonin ndarjen në vija etnike”, tha Omsani.
“Ne po vazhdojmë rrugën e tij, z. president, dhe ju siguroj që pikërisht ato parime mbi të cilat ai si arkitekt i lirisë dhe pavarësisë sonë e ndërtoi këtë shtet, do të punojmë me ju, do të punojmë me gjithë rajonin që paqja në këtë pjesë të botës të bëhet më në fund realitet afatgjatë”, deklaroi Osmani. /InLajmi/
