Prizreni me pietet e kujtoi aktorin e ndjerë Luran Ahmeti
Shkruan: Osman Goranci
Pas Takimeve me krijues eminent të letrave shqipe, që u mbajtën në Kejin e bukur buzë Lumbardhit, në natën e fundit, të këtij evinementi tradicional, që organizohet nga OJQ “Arasta”, para qytetarëve prizrenas dhe familjarëve të tij, u kujtua dhe u fol për madhështinë e lojës në teatër, në seriale dhe në film, të aktorit të ndjerë Luran Ahmeti nga Shkupi, cili në mars të këtij viti, humbi betejën kundër pandemisë #Covid 19#.
Ishte nata e 31 korrikut 2021, datë kjo kur Lurani së bashku me Arbën e vogël, bashkëshorten Edlirën, prindërit Mejremen dhe Xhabirin si dhe me motrën Lenditën, që aq shumë e deshi, do duhej ta kremtonte ditëlindjen. Po, këtë natë ai do t’i mbushte 47 vjet jetë!… Ka lindur në Shkup, por në Prizren i ka kaluar shumë ditë të bukura të fëmijërisë pranë gjyshes së tij tashmë të ndjerë zonjës Alije Zhuri, pranë dajëve, tezës dhe shokëve të shumtë.
“Dhe, mu këtë natë emocionesh, në muzgjet e Prizrenit, deri sa po heshte Lumbardhi, po e vazhdon rrugëtimin e tij, në Kryeqytetin shpirtëror e kulturor të shqiptarisë, Luran Ahmeti, aktor të veçantë i cili me talentin dhe punën e tij e nderoi tërë kombin duke bërë emër si aktor teatri dhe filmi, po e kujtojmë duke e radhitur në mesin e njerëzve që kanë lënë gjurmë të rëndësishme në kulturën tonë, një kulturë e cila ka kaluar nëpër sfida e peripeci nga më të ndryshmet, por që ia ka dalë t’i kapërcejë të gjitha pengesat”, – u shpreh Prof. Haqif Mulliqi, dramaturg, regjisor, kritik dhe, publicist.
Me rolet e shumta në Teatrin shqiptar në Shkup, dhe në skenat e tjera, në seriale dhe filma, në Maqedoninë Veriore, në Kosovë, në Shqipëri, në Turqi dhe kudo, audienca mrekullohej me lojën dhe aktrimin e tij të shkëlqyer. Është antologjik roli i tij në serialin shumë të shikuar “Elveda Rumeli”, me të cilin u bë i njohur jo vetëm në Turqi, ku edhe mori nofkën “Byjyk Arnaut”. Luran Ahmetin, do ta mbajmë në mend edhe si aktor në serialin “Oh sa mirë”, dhe në disa seriale e filma të tjerë. Vlen të përmendet se ka qenë i angazhuar edhe në filmin e njohur “Tejkën”.
Në këto kohëra të vështira pandemie, ai kishte ftesë për të marrë pjesë në një projekt të Netfliksit, por refuzoi të shkonte ngase ishte tepër i lidhur me familjen. Ai kujdesej për secilin anëtar të familjes që të mos e pësojnë nga pandemia #Covid 19#, mirëpo fatkeqësisht vet nuk i shpëtoi kësaj murtaje të ditëve tona.
Dhe, në natën e 31 korrikut, kur duhej t’mbushte 47 vjet jete, në Kejin e bukur buzë Lumbardhit në Prizren, familjarët dhe të pranishmit në këtë natë kujtimi Luran Ahmetin e ndjerë e nderuan jo me një minutë heshtje, por me një minutë duartrokitje. Kurse motra e tij Lindita, poete dhe studiuese tashmë e njohur jo vetëm në trojet tona, i lexoi 2 poezi mjaft emocionuese kushtuar Luranit, që sollën lot në sytë e gjithë të pranishmëve./InLajmi/
