Në Kosovë është duke vazhduar vaksinimi i qytetarëve kundër koronavirusit, ku tashmë të drejtë për të marrë vaksinën kanë të gjithë qytetarët mbi moshën 18 vjeçare.
E në ditën e parë të festës së Kurban Bajramit, qytetarëve po u bëhet thirrje që të vaksinohen kundër koronavirusit.
Instituti Kombëtar i Shëndetit Publik në Kosovë (IKSHPK), përmes një postimi në faqen zyrtare në rrjetin social Facebook, ka kërkuar nga qytetarët të marrin vaksinën kundër COVID-19.
“Puna në Institutin Kombëtar vazhdon pa pushim. Qytetarë të nderuar. Urime Festa e Kurban Bajramit. Ju lutemi vaksinohuni të gjithë për të qenë të shëndetshëm”, thuhet në njoftimin e IKSHPK-së.
Në anën tjetër, ministri i Shëndetësisë, Arben Vitia, në urimin e tij për festën e Kurban Bajramit, tha se qytetarët duhet të vaksinohen, në mënyrë që festat t’i festojnë me hare.
Në Kosovë janë duke u dhënë dy lloje të vaksinës kundër COVID-19, Pfizer dhe AstraZeneca, ndërkaq së fundi, Ministria e Shëndetësisë ka njoftuar qytetarët se kanë të drejtë të zgjedhin se cilin lloj të vaksinës duan të marrin, ndërkohë kanë bërë të ditur se ka doza të mjaftueshme të të dyja llojeve të vaksinave, transmeton Telegrafi.
Ministria e Shëndetësisë ka njoftuar po ashtu se qytetarët të cilët kishin caktuar termin për të marrë vaksinën sot më 20 korrik, MSH ua ka shtyrë terminet për ditën e nesërme, e mërkurë për shkak të festës së Kurban Bajramit.
