Adriana Matoshi, aktorja e njohur, fituese e shumë çmimeve, së fundmi deputete nga radhët e Lëvizjes Vetvendosje, ditë më parë njoftoi se ndihmoi së bashku me deputeten Duda Balje dhe me ndihmën e organeve kompetente një grua dhe vajzat e saja, të cilat për vite me radhë kërkuan drejtësi për dhunën e ushtruar nga kryefamiljari i tyre, përcjell InLajmi.
E sot, deputetja Matoshi, ka njoftuar përmes një postimi në Facebook, se do ta ndihmojë edhe vajzën nga Gjilani, Tuti Sejdiu, e cila ditë më parë rrëmbeu kurorën e “Miss Universe Kosovo 2021”, gjegjësisht ka njoftuar se rastin e saj e merr përsipër Ministria e Drejtësisë.
Pasi mori çmimin, bukuroshja Sejdiu, tha se kurorën ia dedikon babait të saj, karrigia e të cilit ishte bosh pasi ndodhet në burg, derisa për publikun rrëfeu ngjarjen e dhimbshme që i kishte ndodhur, dhunimin dhe trafikimin në moshën 13-vjeçare.
Ajo ka trokitur derë më derë së bashku me familjene saj për të kërkuar drejtësi, por nuk ka gjetur. E në ndihmë i ka dalë deputetja Matoshi.
“Duke iu falenderuar Ministrisë së Drejtësisë dhe njerëzëve të mirë që punojnë aty, drejtësia për Tutin do të arrihet. Ato do të jenë të sigurta. Ju premtoj!“, ka shkruar deputetja, teksa shkurtimisht ka ndarë rrëfmin e saj me miqtë e saj në Facebook.
Postimi i plotë i saj:
Një çikë e fortë, e cila në momentin që e fitoi titullin e më të bukurës në “Miss Univers Kosova” vendosi me e shpalosë historinë e saj te trishtë personale dhe familjare.
Qëllimi i saj nuk ishte titulli i më të bukurës, por sjellja e drejtësisë në vend!
Qysh si e mitur ajo ishte objekt i dhunës seksuale, por tani është në duar të sigurta. Duke iu falenderuar Ministrisë së Drejtësisë dhe njerëzëve të mirë që punojnë aty, drejtësia për Tutin do të arrihet.
Një vajzë si Tuti i duhet Kosovës. E guximshme, e fortë, e dashur dhe shumë motivuese. Vajzat e Kosovës do të kenë mbrojtje institucionale. Ato janë baza e një familje të shëndosh, rrjedhimisht edhe e një kombi të shëndosh. Ato do të jenë të sigurta. Ju premtoj!/InLajmi/
