Nga testimet e fundit të koronavirusit, është konfirmuar edhe një rast me variantin afrikan, përcjell InLajmi.
Raste të variantit afrikan tashmë janë regjistruar në të gjithë botën, por ky është rasti i parë në vendin tonë. Sipas të dhënave të IKSHPK-së, pacienti i infektuar po trajtohet në Klinikën Infektive dhe është bërë e ditur se do të hulumtohen të gjitha kontaktet për identifikimin e rasteve të reja të mundshme, në mënyrë që të ndalohet përhapja e mëtejshme.
Instituti i Shëndetit Publik, ka bërë edhe një herë thirrje për kujdes të shtuar dhe për respektim të masave kufizuese.
Komunikata e plotë e IKSHPK-së:
Në laboratoret e Mikrobiologjisë të IKSHPK, në baza ditore testohen mesatarisht mijëra mostra në ditë. Nga mostrat e testuara në SARS-CoV-2, është konfirmuar edhe një rast me variantin afrikan të SARS CoV-2: South Africa (S.A) Lineage B.11351 (N501Y) (ËHO label: Beta).
Pacienti është i hospitalizuar dhe duke u trajtuar në Klinikën Infektive.
Duke qenë se tashmë rasti është kontaktuar, do të hulumtohen kontaktet për identifikimin eventual të rasteve të reja.
Rastet e tilla të virusit mutagjen janë regjistruar tashmë në shumë vende të botës.
Ekipet hulumtuese të IKSHPK po gjurmojnë pandërprerë të gjitha burimet e mundshme për të parandaluar përhapjen e mëtutjeshme të rasteve dhe implikimet e mundshme në shëndetin e njeriut.
Masat parandaluese janë të njëjta. Personat të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit.
IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës.
Qytetarë të nderuar,
Ju lutemi për kujdes të shtuar! /InLajmi/