Komuna e Shtimes ka njoftuar se sot ka shpallur ditë zie, pas aksidentit të rëndë në Ferizaj që u mori jetën 4 personave. Viktima më e re e aksidentit ishte nxënësi 10-vjeçar Yll Ramadani, i cili humbi jetën së bashku me prindërit dhe gjyshen e tij, përcjell InLajmi.
Me vendim të Komunës është bërë e ditur se të gjitha angazhimet institucionale të planifikuara për ditën e hënë do të pezullohen dhe flamujt do të ulen në gjysmështizë.
Ndërsa, nga shkolla “Emin Duraku” në Shtime, është bërë e ditur se Ylli ishte nxënës i klasës së 4-të dhe me vendim të kryetarit të Komunës, edhe shkolla ka pezulluar të gjitha aktivitetet e saj.
Njoftimi i plotë nga Komuna e Shtimes:
Në mbështetje të Nenit 13 dhe 58, të Ligjit Nr. 03/L-040 për Vetëqeverisje Lokale, si dhe Nenit 54 i Statutit të Komunës së Shtimes, pas aksidentit tragjik në komunikacion, ku humbën jetën 4 anëtarë të familjes Ramadani nga Shtimja, kryetari i Komunës merr këtë:
VENDIM PËR SHPALLJE DITË ZIE
- Më 07.06.2021, ditë e hënë, shpallet ditë zie në komunën e Shtimes,
- Të gjitha angazhimet institucionale të parapara për këtë ditë pezullohen,
- Të gjithë flamujt që janë të vendosur në institucionet komunale, do të ulen në gjysmështizë.
Kryetari i Komunës
Naim Ismajli /InLajmi/
