Sot ishte dita e parë e vaksinimit me dozën e 2-të për qytetarët të cilët tashmë kanë pranuar dozën e parë të vaksinës Astra-Zeneca. Në një komunikatë të Ministrisë së Shëndetësisë është bërë e ditur se edhe Kryeministri i Kosovës Albin Kurti është vaksinuar të hënën, në sallën e sporteve “1 Tetori” në Prishtinë, transmeton InLajmi.
Ministria ka shprehur mirënjohje për ekipin mjekësor dhe përpjekjet e vazhdueshme të stafit që është marrë me vaksinimin kundër koronavirusit.
Njoftim i plotë i Ministrisë së Shëndetësisë:
Ka vazhduar edhe sot procesi i vaksinimit kundër COVID-19, në përputhje me të gjithë parametrat e cilësisë dhe sigurisë nga ekipet e trajnuara në të gjithë vendin.
Tashmë është kryer vaksinimi me dozën e dytë të vaksinës Astra-Zeneca për qytetarët të cilët e kanë marrë dozën e parë të vaksinës në Kukës. Ndërsa sot ishte dita e parë e vaksinimit me dozën e dytë për qytetarët që janë vaksinuar në Kosovë.
Në sallën e sporteve “1 Tetori”, në Prishtinë, dozën e dytë të vaksinës Astra-Zeneca e mori edhe Kryeministri i Republikës së Kosovës, Albin Kurti.
Mirënjohje për profesionistët mjekësor dhe stafin mbështetës për përpjekjet e vazhdueshme për t’u marrë me secilin aspekt kompleks të vaksinimit COVID-19. /InLajmi/