Në vazhdën e eksperimenteve të njerëzimit për të shfrytëzuar fuqinë e yjeve, Kina ka arritur në një pikë mjaft të lartë, transmeton InLajmi.
Të premten, makina e shkrirjes së Akademisë Kineze të Shkencave, arriti që për 101 sekonda të ngjitet në 120 milionë gradë nxehtësi.
Ky rekord u shënua pas provës së vitit 2017 që bëri reaktori eksperimental i avancuar Tokamak, ku në atë kohë, temperatura kishte arritur në vetëm 50 milionë gradë Celsius. Ndërsa, në vitin 2018 ky reaktor kishte arritur të mbajë nxehtësinë përtej standardit 100 milionë gradë, të konsideruar si thelbësor për prodhimin e energjisë, por vetëm për një kohë të shkurtër prej 10 sekondash.
Megjithatë, sipas revistës shkencore Science Alert, duket se eksperimenti i fundit ka drejtuar botën pak më afër këtij burimi të pastër energjie, deri tani të pakapshëm por shumë të kërkuar.
Makina e shkrirjes përdor reaksionet që ndodhin thellë brenda diellit, duke shtrydhur atome të hidrogjenit së bashku, në elementë më të mëdhenj si heliumi. Por, përderisa dielli mbështetet te graviteti për të mbajtur atomet bashkë, këtu në tokë do të duhet të përdoren mjete të tilla si gjeneratorë të ndërtuar posaçërisht për të gjeneruar forcën e shkrirjes së atomeve./InLajmi/