Presidentja e Kosovës, Vjosa Osmani ka përkujtuar 22 vjetorin e shënimit të masakrës së Rezallës duke kërkuar drejtësi për të gjithë të rënët e kësaj masakre, përcjellë InLajmi.
Në këtë masakër trupat e disa civilëve të pagjetur, u gjetën në Rudnicë të Rashkës disa vite më vonë.
Osmani theksoi se liria dhe paqja në Kosovë kanë kuptim vetëm kur përgjegjësit dhe ekzekutuesit të vihen para drejtësisë.
Postimi i plotë i saj:
Drejtësi për Rezallën!
Në Rezallë, më 5 prill të vitit 1999, forcat e regjimit gjenocidal të Serbisë rrethuan shtëpitë e fshatit, ndanë nga gratë, nënat e motrat, 98 djem e burra dhe i ekzekutuan mizorisht.
44 nga këta civilë të vrarë ishin të pagjetur. Disa vite më pas një pjesë e trupave u gjetën në Rudnicë të Rashkës.
3 të mbijetuarit dhe trupat e të vrarëve të gjetur në varreza masive në Serbi ishin dëshmi e fuqishme e krimeve makabre të kryera nga regjimi serb.
22-vjet pas, nevoja për drejtësi riaktualizohet, duke u bërë përpjekje e vazhdueshme e institucioneve të vendit. Ne nuk do të ndalemi së kërkuari vendosjen e drejtësisë për njerëzit tanë sepse ata u privuan nga jeta, vetëm pse ishin shqiptarë. Liria dhe paqja kanë kuptim vetëm kur përgjegjësit dhe ekzekutuesit të vihen para drejtësisë!
Masakra e Rezallës është dhimbje e jona e vazhdueshme, kujtesë historike dhe sakrifica për lirinë e vendit!
Qoftë i përhershëm kujtimi për 98 të vrarët në Masakrën e Rezallës! /InLajmi/
