Manchester Unitedi nuk do të mundë të llogarisë në sulmuesin e vet, Anthony Martial, për pjesën e mbetur të sezonit, për shkak të lëndimit që e pësoi ai në një ndeshje me Kombëtaren e Francës, ka konfirmuar trajneri Ole Gunnar Solskjaer.
Martial, 25 vjeçar, u paraqit për Francën kundër Ukrainës dhe Kazakistanit javën e kaluar, para se të pësonte lëndim në gju.
“Ta humbasësh Anthony për pjesën e mbetur të sezonit është shumë zhgënjyese. Nga Franca na patën thënë se nuk ishte serioze, por duket keq tani”, tha Solskjaer.
Martial i ka shënuar 7 gola për Unitedin në përgjithësi këtë sezon, por vetëm 3 në 19 ndeshje në vitin 2021.
Unitedi nuk do të mundë të llogarisë as në mbrojtësin Eric Bailly në ndeshjet e ardhshme, i cili është infektuar me koronavirus, transmeton Gazeta Express
Skuadra e Solskjaer do të përballet me Granadan në çerekfinale të Ligës së Evropës në 3 të enjtet e ardhshme, si dhe me Tottenhamin të dielën.
