Gjatë ditës së sotme Albin Kurti dhe Vjosa Osmani kanë zhvilluar takime me liderët partiakë të vendit për të biseduar në lidhje me formimin e institucioneve të reja. Së fundi ata pritën në takim liderin e Aleancës për Ardhmërinë e Kosovës, Ramush Haradinaj, raporton InLajmi.
Haradinaj pas përfundimit të takimit ka thënë se është përgjegjësi e fituesve të zgjedhjeve për t’i siguruar votat për president. Ai po ashtu ka thënë se si parti opozitare do të jenë konstruktiv në temat nacionale.
“Takimi ishte konsultues i thirrur nga ana e tyre për formimin e institucioneve, formimin e Qeverisë dhe zgjedhjen e Presidentit. Ne si opozitë do të bashkëpunojmë për temat e interesit nacional, duke ruajtur vendin. Ne mendojmë se funksioni ynë është i rëndësishme në kohën që vjen, për të mundësuar ekuilibrin e institucioneve”, ka deklaruar Haradinaj.
Ai tha se nuk do të kthehen metodat më të hershme të opozitarizmit që i kishte me Kurtin, pasi siç ka thënë ai është plakur.
“I thashë Kurtit që nuk do të kthehen ato metodat tona të hershme të opozitarizmit. Jam plakë. Fituesit e zgjedhjeve të gjejnë mënyrën të formojmë qeverinë. Dhe ne na mbetet të qëndrojmë opozitë”, tha Haradinaj.
“Është përgjegjësia e tyre të mendojnë se si do të bëjnë dy të tretat e parlamentit”, shtoi ai. /InLajmi/
