Të gjithë prishtinasit gjatë muajve të dimrit transportin urban do të mund ta shfrytëzojnë pa paguar asnjë cent.
Kështu ka vendosur Kuvendi Komunal, me propozimin e Partisë Demokratike të Kosovës, nga i cili të gjithë kryeqytetasit lirohen nga pagesa e biletës deri në mars të 2021-ës.
Për këtë, asamblisti Leotrim Retkoceri tregon se ekzistojnë edhe mundësitë buxhetore dhe po pritet vetëm drita e gjelbër nga kryetari, Shpend Ahmeti.
”Komuna ka të pashpenzuar vetëm 60 përqind të buxhetit të saj, pra ky është një argument i mjaftueshëm që të lirohen qytetarët nga pagesa në Trafikun Ubran dhe kosto të subvencionohet nga komuna përmes buxhetit të pashpenzuar”, ka thënë Retkoceri.
Ilirik Musliu nga PDK-ja e Prishtinës beson se iniciativa e tyre që u miratua me 11 nëntor nga asambleja komunale, do të jetë efektive për zhbllokim të trafikut e mbrojtje të ajrit.
”Gjë që do të ndikonte në uljen e qarkullimit të veturave dhe përmirësimin e cilësisë së ajrit. Kjo masë do të vlejë për të gjithë qytetarët pa përjashtim, duke nxitur ata që të përdorin më shumë transportin publik dhe jo veturat private”, njofton Klan Kosova.
Për propozimin e partisë opozitare në kryeqytet, 22 asamblistë votuan për, shtatë kundër ndërsa një abstenoi.
