Ministrja e Kulturës, Rinisë dhe Sportit, Vlora Dumoshi, ka thënë se në pakon emergjente, për rini, kulturë dhe sport janë paraparë 5 milionë euro, raporton InLajmi.
Gjatë një vizite në Istog, Dumoshi tha se të rinjve duhet t’iu krijohen kushte që të mos migrojnë jashtë vendit.
Ministrja e MKRS-së ka vizituar sot komunën e Istogut ku është takuar me kryetarin Haki Rugova.
“Presim edhe rishikimin e dytë, sa i përket buxhetit. Kryeministri Hoti ka paraparë pakon për rini, kulturë dhe sport prej 5 milionë euro. Të rinjve duhet tu krijojmë kushte në mënyrë që të mos migrojnë jashtë vendit”.
Dumoshi ka thënë se është kënaqësi të jetë në Istog, vend që njihet për natyrën e shkëlqyer.
Sipas saj, prioritet në këtë komunë do të jetë zhvillimi i turizmit malor, sikurse dhe trashëgimia kulturore.“Komuna e Istogut është edhe në projektet e trashëgimisë; ku janë 7 projekte. Po ashtu prioritet e kemi edhe turizmin kulturor, sepse kjo komunë ka bjeshkë shumë të mira për ta bërë pjesë turistike”.“Lajmi me i mirë që po kryhen këto punime dhe deri në shtator presim të përfundojnë. Realizimi i qendrave është objektivi kryesor”.
“Ne do ta ndihmojmë me konceptin se si duhet të jetë muzeu. Tash e kemi edhe themelimin e muzeut të burgut të Prishtinës dhe do ta fusim në projekt edhe projektin e memorialit ‘Ibrahim Rugova’”.
Kryetari i Komunës së Istogut, Haki Rugova, falënderoi ministren për përkrahjen e vazhdueshme në realizimin e projekteve në këtë komunë.
“Ne i kemi kryer disa punë edhe të stadiumi. Problemi kryesor është memoriali ‘Ibrahim Rugova’ dhe të shihet çka mund të bëhet në të ardhmen”, tha Rugova./InLajmi/
