Polici me inicialet G.K është suspenduar të mërkurën nga detyra, pasi i njëjti shprehu gëzim në rrjetin social në Facebook, për aktakuzat e ngritura nga Prokurori i Gjykatës Speciale, ndaj Presidentit të Kosovës, Hashim Thaçi dhe kryetarit të Partisë Demokratike të Kosovës (PDK), Kadri Veseli.
Lajmin për Telegrafin e ka konfirmuar drejtori i Përgjithshëm i Policisë së Kosovës, Rashit Qalaj.
Qalaj theksoi se Policia e Kosovës i ka të ndaluar komentet pozitive apo negative në rrjete sociale të zyrtarëve policorë.
“Dje është suspenduar zyrtari policor. Ju e dini që i kemi ndaluar komentet pozitive dhe negative nëpër rrjete sociale. Kjo është arsyeja e suspendimit të tij”, tregoi Qalaj.
Ndryshe, një urdhëresë e lëshuar nga Drejtoria e Përgjithshme e Policisë së Kosovës, ua ndalon pjesëtarëve të saj të postojnë apo të komentojnë nëpër rrjetet sociale.
