Shoqata e Bankave të Kosovë (SHBK) ka sqaruar se raportimet e fundit mbi pagesën e interesit nga klientët gjatë pandemisë janë keqinformim dhe konfuzitet për opinionin.
SHBK ka konfirmuar se nuk do të ketë kamatë ndëshkuese për mosaplikimin e normës së rregullt të interesit.
Drejtori i Shoqatës së Bankave, Petrit Balija ka thënë se interesi i kredisë nuk mund të falet nga sektori bankar, pasi siç tha ai këtë nuk e praktikon asnjë vend në botë.
Siç tha ai, është bërë vetëm një shtyrje e këstit në mënyrë që qytetarët të kenë mundësi t’i bëjnë pagesat pas kalimit të situatës emergjente.
“Ka pasur keqinformim, BQK dhe Shoqata e Bankave në vendimin e tyre kanë thënë se nuk do të aplikohet kamatë ndëshkuese e kjo është keqkuptuar në publik, që bëhet fjalë për mos aplikimin e normës së rregullt të interesit”.
“Në asnjë vend të botës nuk është praktikuar të falet interesi nga sektori bankar, është bërë thjesht një shtyrje e këstit në mënyrë që qytetarët të kenë mundësi t’i bëjnë pagesat pas kalimit të situatës emergjente”, ka thënë Balija.
Mes tjerash, Balija theksoi se sektori bankar ka shpëtuar ekonominë e vendit nga kolapsi total si shkak i situatës së krijuar nga pandemia.
Sipas Shoqatës së Bankave të Kosovës, likuiditetit i sektori bankar ka ruajtur stabilitetin financiar duke ofruar edhe masa lehtësuese për bizneset, raporton Ekonomia Online.
“Sektori bankar ka shpëtuar ekonominë e Kosovës nga kolapsi total gjatë kësaj periudhe për shkak se pari ka qenë një sektor i përgatitur e i kapitalizuar dhe likuid. Gjë që e ka ruajtur stabilitetin financiar si dhe ka ofruar masa lehtësuese për bizneset. Duke shtyrë këstin e kredive që ka ofruar një fleksibilitet në qarkullimin e parasë për secilin”, shtoi Balija.
