Presidenti i vendit Hashim Thaçi, ka zhvilluar gjatë ditës së sotme disa takime me liderët e partive politike dhe për të cilat ka folur në një konferencë për medie. Duke përmendur secili takim veç e veç ai ka thënë se me të gjithë është dakorduar se interesi ynë i përbashkët është interesi i qytetarëve.
“Natyrisht që është në interes që të punojmë të gjithë edhe në parlament edhe në Qeveri dhe në institucione siç ka ndodhur në të kaluarën, u konfirmua se interesi i jetës së qytetarëve dhe marrëveshja eventuale që mund të arrihej mes Kosovës dhe Serbisë do t’i hapte rrugë zhvillimit ekonomik, paqja është në interes të të gjithëve”, tha Thaçi.
Ai tutje ka komentuar edhe anulimin e takimit me kryeministrin Albin Kurti, për të cilin tha se Kosova nuk ka kohë të pres dhe të ruaj teket e askujt, shkruan IndeksOnline.
“Gjithashtu për hir të transparencës së plotë për sot ka qenë e konfirmuar edhe një takim me kryeministrin e Qeverisë së Kosovës dhe liderit të LVV-së Albin Kurti, edhe pse ka qenë i konfirmuar, edhe pse ishte shtyrë me kërkesë të tij në ora 13:00 por për fat të keq 5 minuta më parë ishte anuluar ai takim. Unë do ta takoj kurdo që ka interes por Kosova nuk ka kohë për të pritur apo ruajtur teket e askujt”, tha Thaçi.