Ministri i Jashtëm i Shqipërisë Gent Cakaj, po merr pjesë në mbledhjen e ministrave të Jashtëm të Vishegradit dhe Ballkanit Perëndimor, shkruan InLajmi
Cakaj tha se edhe njëherë u përsërit mbështetja e V4 për perspektivën evropiane të Ballkanit Perëndimor.
I pari i diplomacisë shqiptare në Pragë ka kërkuar liberalizimin e vizave për Kosovën. Ai theksoi se çdo vonesë është e padrejtë.
Postimi i plotë
“Sot në Pragë mora pjesë në mbledhjen e Ministrave të Jashtëm të vendeve të Vishegradit (V4) dhe Ballkanit Perëndimor.
Në takim edhe njëherë u përsërit mbështetja e V4 për perspektivën evropiane të Ballkanit Perëndimor
Në fjalën time theksova dy çështje kryesore lidhur me rajonin:
- Rëndësinë e çeljes së negociatave me BE-në për anëtarësimin e Shqipërisë sa më parë: Shqipëria, ashtu siç e ka konfirmuar deri më tani edhe Komisioni Evropian, ka përmbushur të gjitha kushtet e nevojshme për të filluar bisedimet e anëtarësimit. Paraqitja e metodologjisë së re ka krijuar një momentum të ri politik brenda Bashkimit Evropian, i cili duhet shfrytëzuar gjithsesi.
- Domosdoshmërinë e liberalizimit të vizave me Republikën e Kosovës. Çdo vonesë është e padrejtë sepse Kosova i ka plotësuar të gjitha kushtet e nevojshme për të siguruar lëvizjen e lirë. Po ashtu, nënvizova se marrëveshja Kosovë-Serbi nuk duhet të përfundojë me asgjë më pak se me njohjen e Republikës së Kosovës nga Serbia.
Vendet e Vishegradit edhe njëherë njëzëri konfirmuan mbështetjen për hapjen e negociatave për anëtarësimin e Shqipërisë në BE menjëherë” /InLajmi/
