Kryeministri Albin Kurti ka njoftuar se Qeveria e Kosovës ka marrë vendim që tarifa për lëndën e parë që vjen në Kosovë nga Serbia dhe Bosnja, të hiqet nga data 15 mars. Ndërsa nga prilli, tarifa do të hiqet krejt, nëse plotësohen disa kushte.
“Pas takimeve me Odat dhe shoqatat e ndryshme e sidomos me prodhuesit tanë dhe pas leximit të analizës së reciprocitetit e punuar nga Ministria e Ekonomisë kam ardhur të ky qëndrim sa i përket taksës 100%.Si qeveri e Kosovës gjatë javës së ardhshme nga datat 15 mars të hiqet tarifa për lëndën e parë që importohet nga Serbia dhe Bosnja si shenjë e zgjidhjes së mirëfilltë të mosmarrëveshjeve me Serbinë. Ftojmë Serbinë që të zotohet se do ta ndërpresë fushatën për çnjohjen e pavarësisë së Kosovës”, tha Kurti, raporton Ekonomia Online.
“Bashkimi Evropian ta vlerësojë lart vendimin e palës kosovare për të hequr tarifën duke ofruar liberalizimin e vizave. Në rast se Serbia nuk e përfill vullnetin e Kosovës dhe për pasojë nuk e pushon fushatën dhe nuk fillon me heqjen e barrierave, atëherë Qeveria nga data 1 Prill do të nisë me implementimin e reciprocitetit njëherë në fushën e tregtisë”.
