Fatmir Limaj ka thënë se kryeministri Albin Kurti dhe presidenti Hashim Thaçi e njohin njëri-tjetrin pasi janë të njëjtë.
Limaj ka thënë se Kurti duhet të kërkojë falje pasi ka ardhur në pushtet me kauza të rrejshme, e duhet t’i kërkojë falje edhe opozitës së tanishme pasi “i ka sharë të djathtë e në të majtë”.
“Në Kuvend iu vardis Veselit, derisa më herët kurrë nuk e ka quajtur në emër, por vetëm kriminel. Kurti duhet të japë dëshmi të vullnetit të mirë, me angazhime serioze. E nuk mundet paradite të denoncojë e pasdite të kërkojë bashkëpunim (me presidentin Thaçi). Unë nuk po i kuptoj këta dy njerëz. Paradite kërkojnë bashkëpunim e pasdite shahen. Ata duhet me u taku në çdo kohë e në çdo orë. Këta dy e njohin njëri-tjetrit sepse i ngjajnë njëri-tjetrit”, ka thënë Limaj.
Ai nuk ka përjashtuar bashkëpunimin me kryeministrin Kurti për temat e mëdha, mëgjithatë ai ka theksuar se ende s’ka pasur asgjë konkrete nga ana e kryeministrit.
“Çdo gjë e mirë që është për vendin ne do ta mbështesim. Ende nuk kemi dëgjuar asgjë konkrete nga kryeministri”, është shprehur ai.
Fatmir Limaj ka thënë se shqetësimi i tij është se dalëngadalë po kthehen temat e ndarjes së Kosovës dhe ajo e Asociacionit të Komunave Serbe.
“Në të kaluarën e afërt stërkeqja e dialogut Kosovë – Serbi është se na ka vënë në përplasje shoqërore. Shqetësimi im është se tema e ndarjes së Kosovës, e Asociacioni dalëngadalë po na kthehen. Dhe ajo çfarë i kam thënë unë Kurtit është se dua të shoh një kryeministër që duhet të ketë shumë kujdes që të kemi një marrëveshje të mirë, e jo të kujdeset për veten”, ka thënë Limaj.
Sipas tij Kurti ka përdorur dy karta për të ardhë në pushtet: Atë të patriotizmit dhe sociale.
“Ai ka ardhur këtu duke përdorur dy karta. Deri më 2017 ka goditur, ka luajtur me kartën patriotike, nacionaliste dhe ka goditur zemrat e atyre patriotëve me zemër të pastër. Duke goditur temën e bashkimit kombëtar dhe jo negoaciata me Serbinë. E kur e ka parë se nuk ma shumë vota nga kjo, pastaj ka goditur kartën sociale. Ai thoshte se nuk bënë të ketë dialog pa falje nga Serbia e pa të pagjeturit. Në këto tema duhet të ketë kujdes”, ka thënë Limaj.
Ai thekson se nuk e kishte kërcënuar Kurtin në Kuvend, derisa thotë se është i frikëshëm ndryshimi i Kurtit.
“Shenjat janë të këqija, dhe duhet të kemi kujdes për këto tema. Kur kam parë ndryshimin e tij 180 shkallë më ka frikuar. Dua që kryeministri im të shkojë aty ku duhet dhe mos me nxjerrë marrëveshje të dëmshme”, ka thënë Limaj.
Limaj ka shtuar se situata rreth dialogut është më serioze se që po shihet.
“Në qendrat kryesore shiko se çfarë zihet, dhe me çfarë merret kryeministri jonë. Përgjegjësinë kryesore e kanë institucionet e vendit dhe kur kemi qenë në pushtet kemi provuar ta themi këtë. Kjo është fatkeqësi. Autonomia për të cilën po flitet është me i dhënë fund Kosovës. Situata është më serioze se që po e shohim e apeli im është që fillojmë më seriozisht me këto tema pasi koha nuk pret dhe sa më serioz që të jemi do të arrijmë marrëveshje më të mirë”, ka thënë ai.
Ai ka bërë thirrje që Kosova të ketë kujdes me aleatët, derisa ka theksuar se jemi shumë vonë për çështjen e dialogut.
“Shumë jemi të vonuar si Kosovë, jemi vonuar me vite. Së pari 2013-14 ka qenë dëm i madh se si është qasur dialogut. Më 2017 e këtij është një përpjekje që të gjendet një gjuhë e përbashkët, dhe siç e dini nuk u krijua një grup unitetit. Serbia gjatë kësaj kohe ka qenë në ofansivë dhe e ka shfrytëzuar secilën situatë. Për herë të parë në Kosovë kanë ardhë dhe kanë parë qëndrime të ndryshme, dhe Serbia këtë e ka shfrytëzuar. Ahtisari ++ është folur që nga 2011”, u shpreh Limaj.
Kreu i Nismës thotë se duhet të merret seriozisht çështja e dialogut për shkak të angazhimit të madh të SHBA-së.
“E marrë seriozisht fokusimin e Trumpit e BE-së pasi ka një veprim konkret se duan një marrëveshje, dhe kjo dëshirë duhet të përputhet për të shkuar drejt marrëveshjes. E nëse kjo nuk bëhet. Në dialog mund të shkohet të bisedohet e mundesh mos u pajtu, por me sjelljen që jemi duke e bërë këtu dhe nëse shihet se s’jemi angazhuar mund të na kushtojë. Kryeministri e ka në axhendën e tij ka tri prioritete para dialogut, por mendoj se do t’i harrojë ato, tash të presim”, u shpreh ai.
Limaj, vlerësoi se Kosova është vonuar me dialogun dhe se pasojat, po vërehen dita-ditës.
Ai ka shtuar se Qeveria nuk ka kapur momentin, sidomos pas përfshirjes së presidentit amerikan Donald Trump dhe kancelares gjermane, Angela Merkel.
“Tash e 3-4 vjet, Merkel po merret me Kosovën. Paramendoni sa punët i ka një kancelare gjermane. Zyra e saj është e interesuar të zgjidhë problemin e Kosovës. Por, cila është sjellja jonë? Në mars, unë pres marrëveshje tjera, të kësaj natyre”, ka thënë Limaj gjatë intervistës në “Rubikon” të KTV-së.
Ai ka folur edhe për taksën ndaj mallrave të Serbisë, të vendosur nga Qeveria Haradinaj dhe për reciprocitetin e paralajmëruar nga kryeministri Albin Kurti. Ka kritikuar Kurtin, pasi sipas tij, nuk është i qartë në atë që ka propozuar.
“Kjo tregon që reciprocitetin e kanë kryer me një fjalë në programin e tyre, edhe janë ndalur. Këta nuk dinë çka është reciprociteti. Nuk e kanë shtjelluar deri në fund. Ka thënë se do të ketë reciprocitet politik, ekonomik e tregtar. Kur dilni me një qëndrim të tillë, duhet ta bëni me detaje”, ka thënë Limaj.
Ai nuk ka dashur të flasë për taksën, nëse duhet hequr apo jo. Ka thënë se po e pret qëndrimin e kryeministrit.
“Duhet ta dëgjojmë kryeministrin. Unë e pres atë të shoh se si po vepron. Unë e kam qëndrimin tim, sonte s’do të flas për këtë. Ne presim të vijë kryeministri me planin për reciprocitetin. S’duam ta nxjerrim në presion. Duam të shohim opsionin e tij. Le të vijë me dokumente dhe në bazën e tyre, do të gjykojmë”, ka shtuar ai.
Ai ka thënë se duhet pasur kujdes në këtë, pasi sipas tij, një qeveri është larguar për shkak të taksës “pak a shumë”, duke iu referuar Qeverisë Haradinaj.
“Reciprociteti i implikon 30 e diçka marrëveshje. Shumë më komplekse është kjo çështje se që po flitet. Kjo tregon se partnerët e koalicionit nuk e kanë studiuar deri në fund. Mezi po e presim atë letër, atëherë do të keni qëndrimin tonë. Partnerët kanë qasje të ndryshme me sa po shoh unë”.
Limaj, ka vlerësuar në një intervistë dhënë në “Rubikon” të KTV-së, se kryeministri Albin Kurti ishte në dijeni të marrëveshjeve që u nënshkruan në Munih javë më parë me ndërmjetësimin e ambasadorit amerikan në Berlin, Richard Grenell, për aviacionin dhe hekurudhat. Por sipas tij, Kurti zgjodhi të bëjë lojë, të mbetët në hije.
Limaj shtoi se Kurti fillimisht tha se nuk ishte në dijeni për marrëveshjet, kurse tash, sipas tij, thotë se i ka trajtuar ato tema.
I pari i Nismës pohoi se Kurti as nuk u mori përgjegjësinë që i takon, e as nuk e autorizoi ministrin t’i nënshkruajë ato.
“Çdo marrëveshje është draft derisa nuk nënshkruhet, e ka pasur para vetës. E ka pasur edhe ministrin Lumir Abdixhiku. Kryeministri nuk ka dashur, ministrit nuk ai ka dhënë autorizimin, e për këtë i ka dërguar dy drejtorë”, ka thënë Limaj.
Sipas tij, në momentin që kryeministri e ka parë që marrëveshjet janë në shpërputhje me ligjet e Kosovës, atëherë është dashur t’i refuzojë.
“Kryeministri është dashur të marrë vendim, jo të heshtë. Ky është veprimi më i keq. Është dashur t’u jepen urdhra edhe drejtorëve, jo të heshtë. Mendoni ju se drejtorët kanë shkuar pa marrëveshje me Qeverinë? Atëherë, nëse do të ishte kështu, do të duhej të shkarkoheshin drejtorët. Kryeministri jonë po fshihet pas dy drejtorëve”, ka shtuar Limaj.
Limaj e ka quajtur skandaloze konferencën e sotme të kryeministrit Albin Kurti për pretendimet e tij se presidenti Hashim Thaçi ka shkelur Kushtetutën me marrëveshjen e vitit 2013 me NATO-n, sa ishte kryeministër.
Sipas tij ajo ishte vetëm një letër ndërmjet NATO-s dhe qeverisë së Kosovës, por nuk ishte marrëveshje dhe nuk është as sekrete.
“Për mua nuk është marrëveshje, ajo letër është zotim që një Qeveri e Kosovës ia ka dhënë NATO-s. Nga ajo që shihet se më 2013 është diskutuar çështja e sigurisë ku është folur për gjykatat, policinë. Në Bruksel ka pasur një diskutim. NATO në Kosovë ende funksionon me 1244, pra është neutrale për Pavarësinë e Kosovës. Në këtë situatë drejtuesit e shtetit duhet të jenë të kujdesshëm dhe të shohin historinë. Kur është biseduar, atëherë kemi pasur një frikë, por kjo nuk është sekrete pasi është diskutuar në Kuvend. Ne kemi pasur informacione se as Policia të mos mund të shkonte në veri dhe kjo ishte skandal, madje as ajo speciale. Por, ajo ka shkuar në veri dhe kjo është parë në disa raste”, ka thënë Limaj.
Sipas tij një gjë e tillë është diskutuar edhe më parë edhe nga kryeministrat.
“Deklarimet e vazhdueshme, nga kryeministrat Thaçi e Mustafa, kanë qenë se kemi arritur një pajtim që FSK-ja në pjesën veriore nuk mund të shkojë pa koordinimin me NATO-n, mirëpo policia po. Letrën nuk e kam parë, por si zotim e kam parë. Për mua së pari nuk është marrëveshje dhe e dyta nuk është sekrete”, u shpreh Limaj.
Ai e ka quajtur skandaloze konferencën e Kurtit, pasi sipas tij, ai do të duhej të merrte vendim rreth asaj letre.
“Për mua ka qenë një konferencë shtypi krejtësisht skandaloze, pasi kryeministri duhet të marrë vendime, pasi është dashur të marrë vendim që ta shfuqizojë. Pra, kryeministri është për të vepruar, jo për të komentuar. Kur kryeministri del në konferencë duhet të ketë qëndrim”, ka thënë Limaj.
Ai ka shtuar se sot kanë pranuar të gjithë deputetët këtë dokument nga Kurti, që sipas Limajt nuk është as e Zyrës Ligjore, pasi nuk ka autorë fare.
“Ai interpretim nuk ishte i zyrës ligjore. Në shkresën tonë nuk ka opinion të shkresës ligjore. Është letra e kryeministrit Thaçi dhe përgjigja e sekretarit të NATO-së dhe katër pesë faqe janë interpretim, dhe aty nuk ka shkresë të Zyrës Ligjore. Zyra Ligjore kur të bëhet një shkresë i tregon kryeministrit se a është e ligjshme apo jo. Në dokumentin që kemi marrë nuk ekziston asnjë gjë, përveç që është opinion pasi nuk e dimë as kush e ka shkruar. Në gjuhën angleze dhe shqipe është letra e kryeministrit Thaçi, kurse përgjigjen e sekretarit e kemi marrë vetëm në gjuhën angleze”, ka thënë Limajt.
Limaj ka shtuar se do të ishte lajm sikur Kurti të tregonte ndonjë marrëveshje sekrete ndërmjet Thaçit dhe Serbisë.
“Kryeministri sikur të thoshte sot se ka gjetur një marrëveshje sekrete ndërmjet Thaçit dhe Serbisë, ai do të ishte lajm. Nuk ka marrëveshje sekrete me NATO-n, pasi ky institucion nuk bën marrëveshje sekrete. Marrëdhënia e Kosovës me NATO-n është shumë e veçantë. As nuk e kam hulumtuar atë letër, e as nuk e kam pa”, u shpreh Limaj.
Tutje kreu i Nismës ka thënë se ky veprim i Kurtit shkon në favor të Thaçit, raporton KTV.
“Kjo nuk e godet Thaçin, kjo e ndihmon atë. NATO krejt Kosovën e ka”, ka thënë Kurti.
