Kryetarja e Kuvendit të Kosovës, Vjosa Osmani, ka thënë se partia e saj LDK-ja dhe partneri i ri qeverisës, VV-ja, nuk do ta kenë problem zgjidhjen e çështjes së presidentit, që do të votohet pas një viti.
Edhe pse fillimisht kjo çështje ishte pikë ngecjeje në negociatat për formimin e koalicionit qeverisës, Osmani thotë se palët janë marrë vesh që krerët e partive të diskutojnë për propozimin për president, kur t’i vijë koha.
“Besoj se do të kemi president që do të zgjidhet me sukses. Ne jemi pajtuar që të dy kryetarët e partive ta rregullojnë këtë çështje në një ujdi të përbashkët në një akt të veçantë që do të arrihet mes tyre, e duke pa diskutimet jam e bindur se s’do të ketë problem që të arrihet kjo pajtueshmëri. Edhe gjatë diskutimeve ne s’kemi insistuar që kandidati patjetër të jetë anëtar i LDK-së, por që propozimi të bëhet nga LDK-ja. Kur të arrijmë aty, të vlerësohet atë kohë kush është kandidati më i mirë. Kur të vijë koha e presidentit, kjo qeveri do të ketë një vit pas zgjedhjes. Do të ketë plot sfida, e plot suksese. S’besoj se ka interes për të shkuar sërish në zgjedhje sepse në atë kohë nis të marrë këmbët. Atëherë unë besoj se jo vetëm deputetët e koalicionit, por edhe ata jashtë do të kenë motiv shtesë për të votuar president që na bën nder”, ka thënë ajo.
Osmani thotë se është befasuar që VV-LDK patën probleme për ndarjen e posteve
Teksa ka thënë se marrëveshja me Vetëvendosjen ka qenë jo lehtë e arritshme, nënkryetarja e LDK-së Vjosa Osmani ka thënë se është befasuar që dy partitë patën probleme në ndarjen e posteve.
Ajo ka thënë se në tavolinën e diskutimeve mes dy partive nuk ka pasur gjuhë jo të mirë, e as tensione.
“Jam befasuar edhe unë që ka pasur probleme për pozita. Ka pasur edhe të tjerë që janë befasuar se brenda këtyre tavolinave do të ketë probleme. Por kur dalin fjalët jashtë, keqkuptimet janë të mëdha. Kam parë gjuhë jo të mirë që ka lënduar raportet. Raportet në tavolinën tonë kurrë nuk ishin aq të rënda sa i shihnit në debatet televizive. Ka pasur raste, por në shumicë mund të them se ka ekzistuar respekti i ndërsjellë. S’ka ekzistuar kurrë debati se si të ndahen pasuri të paligjshme, s’është diskutuar si të amnistohet krimi. Pavarësisht dallimeve, ato kanë qenë profesionale, normale, politike, por jo përmes fyerjeve”, ka thënë ajo.
Osmani ka thënë se qëndrimi i saj ka qenë që posti i presidentit të mos jetë pjesë e pazareve politike.
Osmani tregon pse heshti kur kishte ngecje në arritjen e koalicionit VV-LDK
Kryetarja e re e Kuvendit të Kosovës, Vjosa Osmani, në intervistën e parë që nga marrja e këtij posti, ka treguar pse kishte heshtur në periudhën kur bisedimet për arritjen e marrëveshjes për bashkëqeverisje mes Vetëvendosjes dhe LDK-së kishin ngecur.
Ajo ka thënë se me qëllim nuk kishte reaguar që të “mos zgjeronte hendekun mes partnerëve potencialë”.
“Kam heshtur për shkak se kam dëshiruar që të bëhet koalicioni. Kur vërtetë e dëshiron dhe e beson që të arrihet një qëllim, e ndërkohë ke mospajtime me partnerin potencial, në momentin që del në publik dhe i thekson sinqerisht besoj se mund t’i thellojë plagët e të zgjerojë hendeqet mes nesh. Kam besuar se ishte gabim dhe kanë qenë deklaratat e kësaj periudhe që e bënë më të vështirë për ne që shkonim e negocionim”, ka thënë ajo në Rubikon, shkruan Koha.net.
Osmani ka thënë se të dy partitë e dinë se “unë kam bërë më së shumti dhe më së shumti kam insistuar për koalicion”.
https://www.facebook.com/portalikohanet/videos/1284571598406726/
