Kryesia e Kuvendit të Kosovës ka vendosur që seanca për votimin e përbërjes së re të Qeverisë të mbahet më 3 shkurt, një ditë para afatit të fundit kushtetues të kryetarit të VV-së, Albin Kurti që t’i formojë institucionet.
Kryetari i Kuvendit, Glauk Konjufca para mediave ka konfirmuar se seanca është përcaktuar në bazë të kërkesës së Kurtit.
“Ne sapo përfunduam një mbledhje të shpejtë të Kryesisë. Siç e dini mandatari për kryeministër i është drejtuar Kryesisë me një kërkesë për paraqitje të Qeverisë. Kryesia vendosi që seanca të mbahet më 3 shkurt në ora 11:00”, tha ai.
Kujtojmë, se caktimi i seancës për votimin e Qeverisë Kurti, u bë pa një marrëveshje paraprake me Lidhjen Demokratike të Kosovës, transmeton lajmi.net.
Në këto rrethana, këto parti kanë edhe tri ditë kohë për gjetjen e marrëveshjes për bashkëqeverisje.
