Këshilltari i Behgjet Pacollit, Jetlir Zyberaj, ka bërë me dije se sot nuk do të ketë kurrfarë pelegrinazhi në Gjakovë.
Mëngjesin e sotëm, disa qytetarë e familjarë të personave të vrarë e të zhdukur nga lufta e fundit në Kosovë kishin protestuar para kishës në Gjakovë, kështu për të parandaluar ardhjen e pelegrinëve serbë, shkruan InLajmi.
Por, Jetlir Zyberaj, këshilltar i ministrit të detyrë të Punëve të Jashtme, Behgjet Pacolli, ka bërë të ditur se në qytetin e Gjakovës sot nuk do të ketë kurrfarë pelegrinazhi, pasi që zyrtarisht nuk është bërë asnjë kërkesë për këtë.
Njoftimi i plotë i Zyberajt:
Sot, nuk do të ketë kurrfarë pelegrinazhi në Gjakovë, sepse një gjë e tillë nuk është kërkuar nga institucionet e Kosovës. Nuk ka asnjë kerkesë zyrtare për këtë dhe rrjedhimisht nuk ka asgjë të planifikuar.
Bashkëndjejmë me shqetësimet e nënave dhe qytetarëve të Gjakovës, por i garantojmë të gjithë që asnjë kriminel nuk do të jetë asnjëherë pjesë e grupit të pelegrinëvë serbë sepse vendi i tyre do të jetë në burg.
Të gjithë kriminelët serbë që kanë kryer krimet më ç’njerëzore që nga lufta e dytë botërore duhet të dalin para drejtësisë. /InLajmi
